ਕੈਂਸਰ ਪੀੜਤਾਂ ਦੀ ਟੇਕ ਹੁਣ ਨਵੀਂ ਸਰਕਾਰ ਤੇ

ਬਠਿੰਡਾ, ਅਸ਼ੋਕ ਵਰਮਾ

ਪੰਜਾਬ ਦੀ ਮਾਲਵਾ ਪੱਟੀ 'ਚ ਕੈਂਸਰ ਜਿਹੀ ਨਾਮੁਰਾਦ ਬੀਮਾਰੀ ਨਾਲ ਜੂਝ ਰਹੇ ਹਜ਼ਾਰਾਂ ਪੀੜਤਾਂ ਦੀ ਹੋਣੀ ਇਹ ਹੈ ਕਿ ਹੁਣ ਉਹਨਾਂ ਨੂੰ ਨਵੀਂ ਸਰਕਾਰ ਤੋਂ ਆਸ ਹੈ ਕਿ ਉਹ ਉਹਨਾਂ ਦੀ ਬਾਂਹ ਫੜਨ ਲਈ ਅੱਗੇ ਆਵੇਗੀ। ਇਸ ਵਾਰ ਤਾਂ ਹਾਲ ਇਹ ਹੈ ਕਿ ਕੈਂਸਰ ਜਾਗਰੂਕਤਾ ਦਿਵਸ ਤੋਂ ਪਹਿਲਾਂ ਹੋਈਆਂ ਚੋਣਾਂ ਕਾਰਨ ਕਿਸੇ ਵੀ ਸਰਕਾਰੀ ਮੰਤਰੀ ਜਾਂ ਨੁਮਾਇੰਦੇ ਨੇ ਕੈਂਸਰ ਦਾ ਦਰਦ ਹੰਢਾ ਰਹੇ ਲੋਕਾਂ ਖਿਲਾਫ ਹਾਅ ਦਾ ਨਾਅਰਾ ਵੀ ਨਹੀਂ ਮਾਰਿਆ। ਦੁੱਖ ਦੀ ਗੱਲ ਇਹ ਵੀ ਹੈ ਕਿ ਕੈਂਸਰ ਨੇ ਹਜ਼ਾਰਾਂ ਘਰਾਂ ਦੇ ਚਿਰਾਗ ਤਾਂ ਬੁਝਾਏ ਹੀ ਹਨ ਬਲਕਿ ਕਰਜੇ ਦੀ ਮਾਰ ਹੇਠ ਵੀ ਲੈ ਆਂਦਾ ਹੈ। ਜ਼ਿਲ੍ਹਾ ਬਠਿੰਡਾ ਦੇ ਪਿੰਡ ਬਾਲਿਆਵਾਲੀ ਦੀ ਬਿਰਧ ਨਸੀਬ ਕੌਰ ਦੇ ਨਸੀਬ (ਕਿਸਮਤ) ਚੰਗੇ ਹੁੰਦੇ ਤਾਂ ਉਸ ਨੂੰ ਕੈਂਸਰ ਜਿਹਾ ਰੋਗ ਲੱਗਣਾ ਹੀ ਨਹੀਂ ਸੀ। ਪੁੱਤ ਸੁਖਮੰਦਰ ਸਿੰਘ ਨੇ ਮਾਂ ਨੂੰ ਇਸ ਬਿਮਾਰੀ ਤੋਂ ਨਿਜਾਤ ਦਿਵਾਉਣ ਲਈ ਅੱਧਾ ਕਿੱਲਾ ਜਮੀਨ ਵੇਚੀ। ਸੁਖਮੰਦਰ ਸਿੰਘ ਆਖਦਾ ਹੈ ਕਿ ਜੇਕਰ ਸਰਕਾਰੀ ਸਹਾਇਤਾ ਜਾਂ ਇਲਾਜ ਦੇ ਪ੍ਰਬੰਧ ਹੁੰਦੇ ਤਾਂ ਸਾਡੇ ਨਾਲ ਇੰਜ ਨਹੀਂ ਹੋਣਾ ਸੀ। ਪਿੰਡ ਭੈਣੀ ਚੂਹੜ ਦੇ ਸਾਬਕਾ ਸਰਪੰਚ ਗੁਰਬਚਨ ਸਿੰਘ ਨੂੰ ਕਈ ਵਰ੍ਹੇ ਪਹਿਲਾਂ ਕੈਂਸਰ ਕੀ ਹੋਇਆ ਪੋਸਟ ਗਰੈਜੂਏਟ ਪੁੱਤਰ ਗੁਰਤੇਜ ਸਿੰਘ ਦੇ ਅਰਮਾਨਾਂ ਨੂੰ ਹੀ ਗ੍ਰਹਿਣ ਲੱਗ ਗਿਆ। ਇਸ ਪ੍ਰੀਵਾਰ ਦੇ ਸਿਰ ਬੀਮਾਰੀ ਨੇ 5 ਲੱਖ ਤੋਂ ਵੀ ਵੱਧ ਕਰਜਾ ਚਾੜ ਦਿੱਤਾ ਹੈ ਜਦੋਂ ਕਿ ਖੇਤੀ ਕਰਜਿਆਂ ਦੀ ਮਾਰ ਇਸ ਤੋਂ ਵੱਖਰੀ ਹੈ। ਗੁਰਜੀਤ ਸਿੰਘ ਦਾ ਕਹਿਣਾ ਸੀ ਕਿ ਸਾਨੂੰ ਤਾਂ ਕੈਂਸਰ ਨੇ ਕੱਖੋ ਹੌਲੇ ਕਰ ਦਿੱਤਾ ਹੈ। ਮੁੱਖ ਮੰਤਰੀ ਦੇ ਪੁਰਖਿਆਂ ਦੇ ਪਿੰਡ ਘੁੱਦਾ ਦੀ ਰਜਿੰਦਰ ਕੌਰ ਦਾ ਇਲਾਜ ਚੱਲ ਰਿਹਾ ਹੈ। ਹਰੇਕ 6 ਮਹੀਨਿਆਂ ਬਾਅਦ ਜੋ ਫਸਲ ਆਉਂਦੀ ਹੈ ਉਸਦੇ ਇਲਾਜ 'ਚ ਚਲੀ ਜਾਂਦੀ ਹੈ। ਰਜਿੰਦਰ ਕੌਰ ਦਾ ਪੁੱਤਰ ਬਿੰਦਰਪਾਲ ਆਖਦਾ ਹੈ ਕਿ ਜਿੰਨਾਂ ਚਿਰ ਲੱਗੀ ਵਾਹ ਲਾਵਾਂਗੇ ਮਾਂ ਦੀ ਜਾਨ ਤਾਂ ਬਚਾਉਣੀ ਹੈ। ਜ਼ਿਲ੍ਹੇ ਦੇ ਬਲਾਕ ਤਲਵੰਡੀ ਸਾਬੋ ਦੇ ਪਿੰਡ ਗਹਿਰੀ ਭਾਗੀ 'ਚ ਤਾਂ ਕੈਂਸਰ ਨੇ ਕਈ ਘਰਾਂ 'ਚ ਸੱਥਰ ਵਿਛਾ ਦਿੱਤੇ ਹਨ। ਇਸ ਪਿੰਡ ਦਾ ਬਲਵਿੰਦਰ ਸਿੰਘ ਕੈਂਸਰ ਨਾਲ ਮੌਤ ਦੇ ਮੂੰਹ ਜਾ ਪਿਆ ਅਜੇ ਪੁੱਤ ਦਾ ਸਿਵਾ ਠੰਢਾ ਨਹੀਂ ਹੋਇਆ ਸੀ ਕਿ ਕੈਂਸਰ ਨੇ ਮਾਂ ਸੁਰਜੀਤ ਕੌਰ ਦੀ ਜਿੰਦਗੀ ਵੀ ਖੋਹ ਲਈ। ਬਲਵਿੰਦਰ ਸਿੰਘ ਦੀ ਪਤਨੀ ਸਰਬਜੀਤ ਕੌਰ ਵੀ ਕੈਂਸਰ ਦਾ ਦੁੱਖ ਝੱਲ ਰਹੀ ਹੈ। ਇਸ ਪ੍ਰੀਵਾਰ ਨੂੰ ਵੀ ਆਪਣੀ ਇੱਕ ਏਕੜ ਜਮੀਨ ਵੇਚਣੀ ਪਈ ਹੈ ਪਿੱਛੇ ਕੋਈ ਸਹਾਰਾ ਨਹੀਂ ਬਚਿਆ। ਇਸ ਅਭਾਗੀ ਔਰਤ ਨੂੰ ਹੁਣ ਤੱਕ ਕੋਈ ਸਹਾਇਤਾ ਨਹੀਂ ਮਿਲੀ ਪਰ ਧੁੰਦਲੀ ਜਿਹੀ ਆਸ ਹੈ ਕਿ ਸ਼ਾਇਦ ਨਵੇਂ ਹਾਕਮ ਉਹਨਾਂ ਵਰਗੇ ਦੁੱਖਾਂ ਦੇ ਮਾਰਿਆਂ ਦੀ ਸੁਣਵਾਈ ਕਰਨ। ਪਿੰਡ ਸੂਚ ਦੇ ਕਿਸਾਨ ਮਿੱਠੂ ਸਿੰਘ ਤੇ ਲੱਖਾਂ ਦਾ ਕਰਜਾ ਹੈ। ਖੇਤੀ ਤੇ ਆਏ ਸੰਕਟ ਅਤੇ ਕੈਂਸਰ ਨੇ ਘਰ ਦੀਆਂ ਕੰਧਾਂ ਹਿਲਾ ਦਿੱਤੀਆਂ। ਪਤਨੀ ਸੁਖਦੇਵ ਕੌਰ ਨੂੰ ਕੈਂਸਰ ਕੀ ਹੋਇਆ ਗਹਿਣੇ ਤੱਕ ਵਿਕ ਗਏ। ਉੱਪਰੋਂ ਸ਼ਾਹੂਕਾਰਾਂ ਤੋਂ ਪੈਸੇ ਫੜਨੇ ਪਏ। ਦੁਖੀ ਮਨ ਨਾਲ ਮਿੱਠੂ ਸਿੰਘ ਆਖਦਾ ਹੈ ਕਿ ਲੱਖਾਂ ਯਤਨਾਂ ਦੇ ਬਾਵਜੂਦ ਕਰਜਾ ਤੇ ਬਿਮਾਰੀ ਦੋਵੇਂ ਵਧ ਰਹੇ ਹਨ ਪਰ ਸਾਡੇ ਕੋਲ ਹੱਥ ਮਲਣ ਤੋਂ ਸਿਵਾ ਕੋਈ ਚਾਰਾ ਨਹੀਂ ਰਿਹਾ। ਉਸ ਨੇ ਆਖਿਆ ਕਿ ਨਵੀਂ ਸਰਕਾਰ ਸਭ ਤੋਂ ਪਹਿਲਾਂ ਕੰਮ ਕੈਂਸਰ ਨਾਲ ਭੰਨਿਆ ਦਾ ਇਲਾਜ ਕਰਵਾਉਣ ਦਾ ਕਰੇ ਤਾਂ ਹੀ ਠੀਕ ਨਹੀਂ ਤਾਂ ਜਿਹੜੇ ਪੈਲੀ ਹੈ ਉਹ ਵੀ ਵਿਕ ਸਕਦੀ ਹੈ। 
ਪਿੰਡ ਭਾਗੀਵਾਂਦਰ ਦੇ ਗੁਰਦੇਵ ਸਿੰਘ ਦੇ ਟੱਬਰ ਨਾਲ ਤਾਂ ਜੱਗੋਂ ਤੇਰਵੀ ਹੋਈ ਹੈ। ਇਸ ਬਜੁਰਗ ਦੇ ਚਾਰੋਂ ਪੁੱਤਰਾਂ ਨੂੰ ਕੈਂਸਰ ਨੇ ਕੱਖੋਂ ਹੌਲੇ ਕਰ ਦਿੱਤਾ ਹੈ। ਇੱਕ ਪੁੱਤਰ ਨੂੰ ਅੱਖ ਦਾ ਕੈਂਸਰ ਹੈ ਜਦੋਂ ਕਿ 1 ਪੋਤਾ ਤੇ 2 ਪੋਤੀਆਂ ਵੀ ਕੈਂਸਰ ਦੀ ਮਾਰ ਹੇਠ ਆਏ ਹੋਏ ਹਨ। ਇਸ ਪ੍ਰੀਵਾਰ ਬਾਰੇ ਮਿਲੇ ਦਿਲ ਹਿਲਾ ਦੇਣ ਵਾਲੇ ਵੇਰਵਿਆਂ ਮੁਤਾਬਿਕ ਕੈਂਸਰ ਕਾਰਨ ਬੱਚਿਆਂ ਦੀ ਇੱਕ-ਇੱਕ ਅੱਖ ਕਢਵਾਉਣੀ ਪਈ ਹੈ। ਇਸ ਪ੍ਰੀਵਾਰ ਦੀ ਮਹਿਲਾ ਕੁਲਵੰਤ ਕੌਰ ਅਨੁਸਾਰ ਏਸ ਬਿਮਾਰੀ ਨੇ ਤਾਂ ਘਰ ਨੂੰ ਮੂਧਾ ਮਾਰ ਦਿੱਤਾ ਹੈ। ਕਿਸੇ ਨੇ ਵੀ ਕੋਈ ਸਹਾਰਾ ਨਹੀਂ ਦਿੱਤਾ। ਪ੍ਰਾਪਤ ਜਾਣਕਾਰੀ ਮੁਤਾਬਿਕ ਇਕੱਲੇ ਇਸ ਪਿੰਡ 'ਚ ਪਿਛਲੇ ਨੌ ਵਰਿਆਂ ਦੌਰਾਨ ਦੋ ਦਰਜ਼ਨ ਦੇ ਕਰੀਬ ਮਰੀਜ ਕੈਂਸਰ ਦੀ ਲਪੇਟ 'ਚ ਆਏ ਹੋਏ ਹਨ। ਕਈ ਘਰ ਤਾਂ ਅਜਿਹੇ ਹਨ ਜਿੰਨਾਂ ਸਿਰ ਬਿਮਾਰੀ ਨੇ ਕਰਜਾ ਵੀ ਚਾੜ ਦਿੱਤਾ। ਨਾ ਇਹ ਪ੍ਰੀਵਾਰ ਕਰਜਾ ਮੋੜ ਸਕੇ ਤੇ ਨਾ ਹੀ ਆਪਣਾ ਜੀਅ ਬਚਾ ਸਕੇ ਹਨ। ਪਿੰਡ ਕੋਟਸ਼ਮੀਰ ਦੇ ਦੋ ਕਿਸਾਨ ਇਕਬਾਲ ਸਿੰਘ ਤੇ ਕਰਮਜੀਤ ਸਿੰਘ ਆਪਣੀ ਮਾਂ ਨੂੰ ਬਚਾਉਣ ਲਈ ਜਮੀਨ ਗੁਆ ਚੁੱਕੇ ਹਨ। ਉਹਨਾਂ ਦੱਸਿਆ ਕਿ ਮਾਂ ਦਾ ਇਲਾਜ ਕਰਵਾਉਣ ਲਈ ਸ਼ਾਹੂਕਾਰਾਂ ਤੋਂ ਕਰਜਾ ਚੁੱਕਦੇ ਰਹੇ ਜਦੋਂ 7 ਲੱਖ ਤੋਂ ਵੀ ਵੱਧ ਕਰਜਾ ਨਾ ਮੋੜਿਆ ਗਿਆ ਤਾਂ ਜਮੀਨ ਗਹਿਣੇ ਕਰਨੀ ਪਈ। ਹੁਣ ਇਹਨਾਂ ਨੂੰ ਸਰਕਾਰੀ ਸਹਾਇਤਾ ਦੀ ਝਾਕ ਹੈ। ਜ਼ਿਲ੍ਹੇ ਦੇ ਪਿੰਡ ਪੱਕਾ ਕਲਾਂ ਦੀ ਕਹਾਣੀ ਵੀ ਕੋਈ ਵੱਖਰੀ ਨਹੀਂ ਹੈ। ਪਿਛਲੇ 10 ਸਾਲਾਂ ਦੌਰਾਨ 4 ਦਰਜ਼ਨ ਤੋਂ ਵੀ ਜਿਆਦਾ ਵਿਅਕਤੀ ਕੈਂਸਰ ਦਾ ਸ਼ਿਕਾਰ ਹੋ ਗਏ ਜਿੰਨਾਂ ਵਿੱਚੋਂ 2 ਦਰਜ਼ਨ ਦੀ ਤਾਂ ਮੌਤ ਵੀ ਹੋ ਗਈ। ਇਸ ਪਿੰਡ ਦੇ ਬੱਚੇ ਤੋਂ ਲੈ ਕੇ ਬੁੱਢਿਆਂ ਨੂੰ ਕੈਂਸਰ ਦੀ ਮਾਰ ਝੱਲਣੀ ਪੈ ਰਹੀ ਹੈ। ਪੱਕਾ ਕਲਾਂ ਦੀ ਇੱਕ ਗਲੀ ਅਜਿਹੀ ਵੀ ਹੈ ਜਿੱਥੇ 7 ਘਰਾਂ 'ਚ ਕੈਂਸਰ ਦੇ ਮਰੀਜ ਹਨ। ਪਿੰਡ ਭੋਖੜਾ ਦੀ ਮਹਿਲਾ ਕਰਮਜੀਤ ਕੌਰ ਦੀ ਤਾਂ ਕੈਂਸਰ ਕਾਰਨ ਲੱਤ ਕੱਟਣੀ ਪਈ ਹੈ। ਉਸ ਨੇ ਦੱਸਿਆ ਕਿ ਲਗਭਗ 4 ਲੱਖ ਇਲਾਜ ਤੇ ਲੱਗ ਚੁੱਕਾ ਹੈ ਕੱਲ ਨੂੰ ਕੀ ਹੋਵੇਗਾ ਕੁੱਝ ਪਤਾ ਨਹੀਂ ਹੈ। 
ਇਹ ਚੰਦ ਕੁ ਮਿਸਾਲਾਂ ਹਨ ਜਦੋਂ ਕਿ ਮਾਲਵਾ ਪੱਟੀ ਦੇ ਸੈਂਕੜੇ ਪਿੰਡਾਂ ਦੀ ਕਹਾਣੀ ਇਹੋ ਜਿਹੀ ਹੈ ਜਿੱਥੇ ਪਿਛਲੇ 20 ਵਰਿਆਂ ਤੋਂ ਕੈਂਸਰ ਦਾ ਪਸਾਰਾ ਵਧ ਰਿਹਾ ਹੈ। ਜ਼ਿਲ੍ਹਾ ਬਠਿੰਡਾ ਦੇ ਦੋ ਦਰਜ਼ਨ ਪਿੰਡ ਤਾਂ ਇਹੋ ਜਿਹੇ ਹਨ ਜਿੱਥੇ ਕੈਂਸਰ ਦੀ ਬਿਮਾਰੀ ਕਾਰਨ ਵੱਧ ਮਾਰ ਪਈ ਹੈ। ਪੀੜਤ ਪ੍ਰੀਵਾਰਾਂ ਦਾ ਕਹਿਣਾ ਸੀ ਕਿ ਸਰਕਾਰਾਂ ਆਈਆਂ ਤੇ ਚਲੀਆਂ ਗਈਆਂ ਪਰ ਕਿਸੇ ਨੇ ਉਹਨਾਂ ਦਾ ਦੁੱਖ ਨਹੀਂ ਸੁਣਿਆ। ਉਹਨਾਂ ਆਖਿਆ ਕਿ ਨਵੀਂ ਸਰਕਾਰ ਦੁੱਖਾਂ ਤੇ ਮੱਲ੍ਹਮ ਲਾਵੇ ਇਹੋ ਆਸ ਹੈ ਨਹੀਂ ਤਾਂ ਕੈਂਸਰ ਪਹਿਲਾਂ ਵੀ ਮੌਤਾਂ ਵੰਡਦਾ ਆ ਰਿਹਾ ਹੈ ਤੇ ਭਵਿੱਖ 'ਚ ਵੀ ਵੰਡਦਾ ਰਹੇਗਾ।

ਸਾਡੀ ਵਾਰੀ ਆਈ ਪਤੀਲੀ ਖੜਕੇ-ਐਡਵੋਕੇਟ ਬਾਂਸਲ

ਨਾਗਰਿਕ ਭਲਾਈ ਸੰਸਥਾ ਦੇ ਪ੍ਰਧਾਨ ਐਡਵੋਕੇਟ ਮਨੋਹਰ ਲਾਲ ਬਾਂਸਲ ਝੰਡੂਕੇ ਵਾਲਿਆਂ ਦਾ ਕਹਿਣਾ ਸੀ ਕਿ ਸਰਕਾਰਾਂ ਕੈਂਸਰ ਦੇ ਮਰੀਜਾਂ ਲਈ ਦਰਿਆਦਿਲੀ ਦਿਖਾਉਂਦੀਆਂ ਤਾਂ ਹਜ਼ਾਰਾਂ ਜਿੰਦਗੀਆਂ ਬਚਾਈਆਂ ਜਾ ਸਕਦੀਆਂ ਸਨ।  ਉਹਨਾਂ ਆਖਿਆ ਕਿ ਹਾਕਮ ਹੋਰ ਕਈ ਕੰਮ ਹਨ ਜਿੱਥੇ ਫਜੂਲ ਖਰਚੀ ਕਰਦੇ ਰਹਿੰਦੇ ਹਨ ਪਰ ਕੈਂਸਰ ਦੇ ਇਲਾਜ ਜਾਂ ਸਹਾਇਤਾ ਲਈ ਖਜਾਨਾ ਖਾਲੀ ਹੋ ਜਾਂਦਾ ਹੈ ਜਿਸ ਕਰਕੇ ਇਹ ਲੋਕ ਨਰਕ ਭੋਗਣ ਲਈ ਮਜਬੂਰ ਹਨ। ਸ੍ਰੀ ਬਾਂਸਲ ਨੇ ਆਖਿਆ ਕਿ ਨਵੀਂ ਸਰਕਾਰ ਨੂੰ ਪਹਿਲ ਦੇ ਅਧਾਰ ਤੇ ਕੈਂਸਰ ਦੇ ਇਲਾਜ ਲਈ ਹਸਪਤਾਲ ਅਤੇ ਪੀੜਤ ਪ੍ਰੀਵਾਰਾਂ ਲਈ ਦਿਲ ਖੋਲ ਕੇ ਫੰਡ ਜਾਰੀ ਕਰਨੇ ਹੋਣਗੇ ਤਾਂ ਹੀ ਇਹਨਾਂ ਦਾ ਮੁੜ ਵਸੇਬਾ ਹੋ ਸਕੇਗਾ