ਬਾਦਲਾਂ ਦੇ ਪੈਰਿਸ ਬਠਿੰਡਾ 'ਚ ਮੰਗਤੇ ਪਾਉਂਦੇ ਨੇ ਦਾਰੂ ਪੀ ਕੇ ਖੌਰੂ

                "ਬੈਗਰਜ ਐਕਟ ਦੀ ਹੁੰਦੀ ਹੈ ਸ਼ਰੇਆਮ ਉਲੰਘਣਾ"

ਦਾਰੂ ਪੀਣ ਮਗਰੋਂ ਭੁਜੀਏ ਦਾ ਸਵਾਦ ਚਖਦਾ ਭਗਵੇਂ ਕਪੜਿਆਂ ਵਾਲਾ ਮੰਗਤਾ 

ਬਠਿੰਡਾ, ਅਸ਼ੋਕ ਵਰਮਾ

ਪੰਜਾਬ ਦੇ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਦੇ ਸੁਪਨਿਆਂ ਦੇ ਪੈਰਿਸ ਬਠਿੰਡਾ ਨੂੰ ਨਜ਼ਰ ਲੱਗ ਗਈ ਹੈ। ਮਹਾਂਨਗਰ 'ਚ ਬਣੀਆਂ ਕਲੋਨੀਆਂ ਅਤੇ ਪਿੰਡਾਂ 'ਚੋਂ ਲੋਕਾਂ ਦੀ ਆਮਦ ਦੇ ਸਿੱਟੇ ਵਜੋਂ ਵਧਦੀ ਅਬਾਦੀ ਸਦਕਾ ਇੱਥੇ ਭਿਖਾਰੀਆਂ ਦੀ ਫੌਜ ਆਣ ਉੱਤਰੀ ਹੈ। ਬਾਦਲ ਪ੍ਰੀਵਾਰ ਦੇ ਸਿਆਸੀ ਨਿਸ਼ਾਨੇ ਕੋਈ ਵੀ ਹੋਣ ਪਰ ਸ਼ਹਿਰ 'ਚ ਇਕੱਠਾ ਹੋਇਆ 'ਮੰਗਤ ਵਾਧਾ' ਹਾਕਮ ਧਿਰਾਂ ਦੇ ਤਰੱਕੀ ਦੇ ਦਾਅਵਿਆਂ ਦੀ ਖਿੱਲੀ ਉਡਾ ਰਿਹਾ ਹੈ। ਮਾਮਲੇ ਦਾ ਜਿਕਰਯੋਗ ਪਹਿਲੂ ਇਹ ਵੀ ਹੈ ਕਿ ਵੱਖ-ਵੱਖ ਉਮਰ ਵਰਗ ਦੇ ਮੰਗਦੇ ਫਿਰਦੇ ਭਿਖਾਰੀ ਬੈਗਰਜ ਐਕਟ ਦੀਆਂ ਸ਼ਰੇਆਮ ਧੱਜੀਆਂ ਉਡਾ ਰਹੇ ਹਨ। ਬਠਿੰਡਾ ਦੀਆਂ ਵੱਖ-ਵੱਖ ਥਾਵਾਂ ਤੇ ਫਿਰਦੀਆਂ ਮੰਗਤਿਆਂ ਦੀਆਂ ਹੇੜਾਂ ਕਾਰਨ ਅਮਨ ਕਾਨੂੰਨ ਨੂੰ ਖਤਰਾ ਖੜਾ ਹੋ ਗਿਆ ਹੈ। ਇਹ ਲੋਕ ਭਗਵੇ ਕੱਪੜਿਆਂ ਦੀ ਆੜ 'ਚ ਦਿਨ ਦਿਹਾੜੇ ਸ਼ਰਾਬ ਪੀ ਕੇ ਹੁੱਲੜਬਾਜੀ ਕਰਦੇ ਅਕਸਰ ਹੀ ਦੇਖੇ ਜਾ ਸਕਦੇ ਹਨ। ਇਹੀ ਨਹੀਂ ਹੈ ਕਿ ਪੁਲਿਸ ਨੇ ਇਹਨਾਂ ਤੇ 'ਖਰਖਰਾ' ਨਹੀਂ ਫੇਰਦੀ ਫਿਰ ਵੀ ਮੁਫਤ ਦੀ ਮਾਇਆ ਕਾਰਨ ਇਹਨਾਂ ਦੀ ਖੜਮਸਤੀ ਘਟਣ ਦੀ ਬਜਾਏ ਵਧਦੀ ਜਾ ਰਹੀ ਹੈ। ਜਾਣਕਾਰੀ ਅਨੁਸਾਰ ਸ਼ਹਿਰ ਦੇ ਬੱਸ ਸਟੈਂਡ, ਰੇਲਵੇ ਸਟੇਸ਼ਨ ਅਤੇ ਵੱਖ-ਵੱਖ ਧਾਰਮਿਕ ਸਥਾਨਾਂ 'ਦੇ ਨੇੜੇ-ਤੇੜੇ ਲਗਭਗ 250 ਦੇ ਕਰੀਬ ਪੱਕੇ ਅਤੇ ਇਸ ਤੋਂ ਵੀ ਦੁੱਗਣੇ ਚਲਦੇ ਫਿਰਦੇ ਮੰਗਤਿਆਂ ਨੇ ਆਪਣਾ ਨੈਟਵਰਕ ਚਲਾਇਆ ਹੋਇਆ ਹੈ। ਇਹ ਵੀ ਪਤਾ ਲੱਗਾ ਹੈ ਕਿ ਕੁੱਝ ਦਬੰਗ ਕਿਸਮ ਦੇ ਭਿਖਾਰੀਆਂ ਨੇ ਧੋਬੀ ਬਜ਼ਾਰ, ਪੋਸਟ ਆਫਿਸ ਬਜ਼ਾਰ, ਸਿਰਕੀ ਬਜ਼ਾਰ ਅਤੇ ਅਜੀਤ ਰੋਡ ਵਰਗੇ ਪਾਸ਼ ਇਲਾਕਿਆਂ ਦੀ ਵੰਡ ਕਰ ਰੱਖੀ ਹੈ ਜਿੱਥੇ ਕੋਈ ਇੱਕ ਦੂਸਰੇ ਦੇ ਖੇਤਰ 'ਚ ਦਖਲ ਨਹੀਂ ਦਿੰਦਾ। ਇਹੋ ਹੀ ਨਹੀਂ ਕਈ ਕਮਾਈ ਵਾਲੇ ਅੱਡਿਆਂ ਤੇ ਕਬਜਾ ਕਰਨ ਦੀ ਦੌੜ 'ਚ ਇੱਕ ਦੂਜੇ ਨਾਲ ਟਕਰਾਅ ਵੀ ਹੁੰਦਾ ਰਹਿੰਦਾ ਹੈ ਜੋ ਕਿ ਕਈ ਵਾਰ ਭਿਆਨਕ ਰੂਪ ਅਖਤਿਆਰ ਕਰ ਜਾਂਦਾ ਹੈ। ਏਸ਼ੀਆ ਦੇ ਸਭ ਤੋਂ ਵੱਡੇ ਰੇਲ ਜੰਕਸ਼ਨ ਤੋਂ ਗੁਜਰਨ ਵਾਲੀਆਂ ਰੇਲ ਗੱਡੀਆਂ 'ਚ ਦਰਜ਼ਨਾਂ ਮੰਗਤੇ ਭੀਖ ਮੰਗਦੇ ਹਨ ਅਤੇ ਹੈਰਾਨੀ ਦੀ ਗੱਲ ਇਹ ਹੈ ਕਿ ਹਰ ਉਮਰ ਦੇ ਮੰਗਤਿਆਂ ਨੇ ਆਪਣਾ ਵੱਖਰਾ ਸਾਮਰਾਜ ਖੜਾ ਕੀਤਾ ਹੋਇਆ ਹੈ। 
ਪੋਲੀਓ ਤੋਂ ਪੀੜਤ ਭਿਖਾਰੀ ਰਿੰਕੂ ਰੇਲ ਗੱਡੀਆਂ 'ਚ ਮੰਗਣ ਦਾ ਮਾਹਿਰ ਹੈ। ਸ਼ਰਾਬ ਅਤੇ ਵਧੀਆ ਖਾਣੇ ਦੇ ਨਾਲ-ਨਾਲ ਫਿਲਮਾਂ ਦੇ ਸ਼ੌਕੀਨ ਰਿੰਕੂ ਨੇ ਦੱਸਿਆ ਕਿ ਉਹ ਹਰ ਨਵੀਂ ਤੇ ਮਨਪਸੰਦ ਫਿਲਮ ਦਿੱਲੀ ਦੇ ਸਿਨੇਮਾਘਰ 'ਚ ਦੇਖਦਾ ਹੈ। ਨਸ਼ੇ 'ਚ ਟੁਨ ਰਿੰਕੂ ਚੇਨਈ, ਜੈਪੁਰ ਤੇ ਮੁੰਬਈ 'ਚ ਚਲਦੇ ਕਈ ਤਰਾਂ ਦੇ ਕਾਲੇ ਕਾਰੋਬਾਰਾਂ ਦਾ ਭੇਤੀ ਹੈ। ਉਸ ਨੇ ਦੱਸਿਆ ਕਿ ਅੱਧੀ ਦਰਜ਼ਨ ਅਜਿਹੇ ਮੁੰਡਿਆਂ ਨੂੰ ਜਾਣਦਾ ਹੈ ਜੋ ਗੱਡੀਆਂ 'ਚ ਘੁੰਮ ਫਿਰਕੇ ਜੇਬਾਂ ਕੱਟਦੇ ਜਾਂ ਫਿਰ ਹੋਰ ਕਈ ਢੰਗਾਂ ਨਾਲ ਲੁੱਟਾਂ ਖੋਹਾਂ ਕਰਦੇ ਹਨ। ਰਿੰਕੂ ਨੇ ਮੰਨਿਆ ਕਿ ਪਿੱਛੇ ਜਿਹੇ ਪੈਸਿਆਂ ਦੀ ਲੋੜ ਪਈ ਤਾਂ ਉਸ ਨੇ ਦਿੱਲੀ ਨੂੰ ਜਾਣ ਵਾਲੀ 'ਕਿਸਾਨ ਐਕਸਪ੍ਰੈੱਸ' 20 ਹਜ਼ਾਰ 'ਚ ਹੋਰ ਮੰਗਤਿਆਂ ਨੂੰ ਵੇਚ ਦਿੱਤੀ ਸੀ ਅਤੇ ਹੁਣ ਉਹ ਪੰਜਾਬ ਮੇਲ ਜਾਂ ਇੰਟਰਸਿਟੀ 'ਚ ਮੰਗਦਾ ਹੋਇਆ ਦਿੱਲੀ ਜਾਂਦਾ ਹੈ।
ਰਿੰਕੂ ਅਨੁਸਾਰ ਕਈ ਲੜਕੇ ਫਿਰੋਜ਼ਪੁਰ, ਬਠਿੰਡਾ ਤੇ ਗੰਗਾਨਗਰ ਵਰਗੀਆਂ ਪੈਸੰਜਰ ਗੱਡੀਆਂ 'ਚੋਂ ਸਮਾਨ ਚੁੱਕਣ ਦਾ ਧੰਦਾ ਕਰਦੇ ਹਨ ਕਿਉਂਕਿ ਇਹਨਾਂ ਰੂਟਾਂ 'ਤੇ ਪੁਲਿਸ ਘੱਟ ਗੇੜਾ ਮਾਰਦੀ ਹੈ ਜਾਂ ਫਿਰ ਜਾਣ ਤੋਂ ਕੰਨੀ ਕਤਰਾਉਂਦੀ ਹੈ। ਇਸ ਗਿਰੋਹ ਬਾਰੇ ਮਿਲੇ ਵੇਰਵਿਆਂ ਅਨੁਸਾਰ ਇਹ ਦੂਸਰੇ ਮੰਗਤਿਆਂ ਤੋਂ ਪੈਸੇ ਵੀ ਖੋਂਹਦੇ ਹਨ। ਇਸ 'ਚ ਸ਼ਾਮਲ ਵਧੇਰੇ ਮੁੰਡੇ ਪੜਾਈ ਦੇ ਡਰੋਂ ਘਰੋਂ ਭੱਜ ਕੇ ਇਸ ਦੁਨੀਆਂ 'ਚ ਸਰਗਰਮ ਹੋਏ ਹਨ। ਪੜਤਾਲ ਉਪਰੰਤ ਇੱਕ ਭਿਖਾਰਨ ਬਾਰੇ ਅਜੀਬੋ ਗਰੀਬ ਤੱਥ ਸਾਹਮਣੇ ਆਏ ਹਨ। ਬਿਹਾਰ ਦੀ ਇਹ ਮਹਿਲਾ ਹਰ ਸਾਲ 20-25 ਹਜ਼ਾਰ ਰੁਪਿਆ ਘਰ ਭੇਜਦੀ ਹੈ। ਦੱਸਦੇ ਹਨ ਕਿ ਇਸ ਨੇ ਕੁੱਝ ਪੈਸੇ ਵਿਆਜ ਤੇ ਵੀ ਦੇ ਰੱਖੇ ਹਨ। ਸ਼ਹਿਰ ਵਿਚਲੇ ਵੱਖ-ਵੱਖ ਵਰਗਾਂ ਨੇ ਮੰਨਿਆ ਕਿ ਉਹ ਇਹਨਾਂ ਮੰਗਤਿਆਂ ਤੋਂ ਬਹੁਤ ਦੁਖੀ ਹਨ ਪਰ ਪ੍ਰਸ਼ਾਸ਼ਨ ਕੁੱਝ ਵੀ ਨਹੀਂ ਕਰ ਰਿਹਾ। 

ਤਿੜਕ ਸਕਦਾ ਹੈ ਸੁਫਨਾ-ਸੋਨੂੰ ਮਹੇਸ਼ਵਰੀ

ਨੌਜੁਆਨ ਵੈਲਫੇਅਰ ਸੁਸਾਇਟੀ ਦੇ ਪ੍ਰਧਾਨ ਸੋਨੂੰ ਮਹੇਸ਼ਵਰੀ ਦਾ ਕਹਿਣਾ ਸੀ ਕਿ ਇਹ ਭਿਖਾਰੀ ਸ਼ਹਿਰ ਦੇ ਗਲੀ ਮੁਹੱਲਿਆਂ ਤੋਂ ਪੂਰੀ ਤਰਾਂ ਵਾਕਿਫ ਹਨ। ਉਹਨਾਂ ਆਖਿਆ ਕਿ ਬਠਿੰਡਾ 'ਚ ਹੁੰਦੀਆਂ ਵਧੇਰੇ ਵਾਰਦਾਤਾਂ 'ਚ ਇਹੋ ਜਿਹੇ ਲੋਕਾਂ ਦਾ ਹੱਥ ਹੋਣ ਦੀ ਵਧੇਰੇ ਸੰਭਾਵਨਾ ਹੈ ਕਿਉਂਕਿ ਇਹ ਜਿਆਦਾਤਰ ਦੂਜੇ ਸੂਬਿਆਂ ਤੋਂ ਜੁਰਮ ਕਰਕੇ ਇੱਥੇ ਆ ਜਾਂਦੇ ਹਨ। ਉਹਨਾਂ ਮੰਗ ਕੀਤੀ ਕਿ ਬੈਗਰਜ ਐਕਟ ਲਾਗੂ ਕਰਕੇ ਆਮ ਲੋਕਾਂ ਨੂੰ ਰਾਹਤ ਪ੍ਰਦਾਨ ਕੀਤੀ ਜਾਏ। ਉਹਨਾਂ ਆਖਿਆ ਕਿ ਸਰਕਾਰ ਨੂੰ ਇਹਨਾਂ ਭਿਖਾਰੀਆਂ ਦੇ ਮੁੜ ਵਸੇਬੇ ਦਾ ਪ੍ਰਬੰਧ ਕਰਨਾ ਚਾਹੀਦਾ ਹੈ ਨਹੀਂ ਤਾਂ ਬਠਿੰਡਾ ਨੂੰ ਪੈਰਿਸ ਬਣਾਉਣ ਦਾ ਸੁਫਨਾ ਤਿੜਕ ਸਕਦਾ ਹੈ।

ਸਖਤ ਕਾਰਵਾਈ ਕਰਾਂਗੇ- ਡੀ. ਐਸ. ਪੀ.

ਬਠਿੰਡਾ ਦੇ ਡੀ. ਐਸ. ਪੀ. (ਡੀ) ਜਸਬੀਰ ਸਿੰਘ ਦਾ ਕਹਿਣਾ ਸੀ ਕਿ ਉਹਨਾਂ ਅਜੇ 3-4 ਦਿਨ ਪਹਿਲਾਂ ਹੀ ਚਾਰਜ ਸੰਭਾਲਿਆ ਹੈ ਇਸ ਲਈ ਸਥਿਤੀ ਤੋਂ ਪੂਰੀ ਤਰਾਂ ਜਾਣੁ ਨਹੀਂ। ਉਹਨਾਂ ਆਖਿਆ ਕਿ ਜਾਣਕਾਰੀ ਹਾਸਿਲ ਕਰਨ ਤੋਂ ਬਾਅਦ ਹੀ ਸਾਰੇ ਥਾਣਿਆਂ ਤੇ ਪੀ. ਸੀ. ਆਰ. ਨੂੰ ਕਰੜੇ ਕਦਮ ਚੁੱਕਣ ਦੀ ਹਦਾਇਤ ਕੀਤੀ ਜਾਏਗੀ ਅਤੇ ਅਮਨ ਕਾਨੂੰਨ ਭੰਗ ਕਰਨ ਵਾਲਿਆਂ ਖਿਲਾਫ ਸਖਤ ਕਾਰਵਾਈ ਕਰਾਂਗੇ।

ਅਕਾਲੀ ਦਲ ਲਈ ਗਲੇ ਦੀ ਹੱਡੀ ਬਣਿਆ ਚਿਰੰਜੀ ਲਾਲ ਮਾਮਲਾ

ਬਠਿੰਡਾ, ਅਸ਼ੋਕ ਵਰਮਾ
ਸਾਬਕਾ ਮੰਤਰੀ ਚਿੰਰਜੀ ਲਾਲ ਗਰਗ ਨੂੰ ਪਾਰਟੀ 'ਚੋਂ ਕੱਢੇ ਤੇ ਮੁੜ ਵਾਪਿਸ ਲਏ ਜਾਣ ਦਾ ਮਾਮਲਾ ਅਕਾਲੀ ਦਲ ਲਈ ਗਲੇ ਦੀ ਹੱਡੀ ਬਣਦਾ ਦਿਖਾਈ ਦੇ ਰਿਹਾ ਹੈ। ਹਾਕਮ ਪਾਰਟੀ ਵੱਲੋਂ ਠੰਢਾ ਕਰਨ ਦੇ ਕੀਤੇ ਯਤਨਾਂ ਦੇ ਬਾਵਜੂਦ ਅੱਜ ਇਹ ਅੱਗ ਪੂਰਾ ਦਿਨ ਧੁਖਦੀ ਰਹੀ। ਵੱਡੀ ਗਿਣਤੀ ਗਰਗ ਸਮਰਥਕਾਂ ਨੇ ਉਹਨਾਂ ਨੂੰ ਮਿਲ ਕੇ ਪੂਰੀ ਹਮਾਇਤ ਦਾ ਭਰੋਸਾ ਦਿੱਤਾ। ਸ੍ਰੀ ਗਰਗ ਨੇ ਆਖਿਆ ਕਿ ਉਹ ਹਰ ਹਾਲਤ 'ਚ ਅਗਲੀ ਚੋਣ ਬਠਿੰਡਾ ਤੋਂ ਲੜਨਗੇ ਜਿਸ ਦੀ ਰੂਪ ਰੇਖਾ 17 ਤਰੀਕ ਨੂੰ ਫਰੀਦਕੋਟ 'ਚ ਕੀਤੀ ਜਾਣ ਵਾਲੀ ਮੀਟਿੰਗ 'ਚ ਉਹਨਾਂ ਦੇ ਸਮਰਥਕ ਤੇ ਅਗਰਵਾਲ ਭਾਈਚਾਰਾ ਤੈਅ ਕਰੇਗਾ। ਗੌਰਤਲਬ ਹੈ ਕਿ ਸ੍ਰੀ ਗਰਗ ਅਗਰਵਾਲ ਸਭਾ ਪੰਜਾਬ ਦੇ ਪ੍ਰਧਾਨ ਹਨ ਜਿਸ ਦਾ ਮਾਲਵਾ ਪੱਟੀ 'ਚ ਵੱਡਾ ਵੋਟ ਬੈਂਕ ਹੈ ਜੋ ਕਿ ਅਕਾਲੀ ਦਲ ਦੇ 25 ਸਾਲ ਦੇ ਰਾਜ ਨੂੰ ਚਕਨਾਚੂਰ ਕਰ ਸਕਦਾ ਹੈ। ਇਸ ਪੱਤਰਕਾਰ ਨਾਲ ਗੱਲਬਾਤ ਕਰਦਿਆਂ ਸਾਬਕਾ ਮੰਤਰੀ ਨੇ ਆਖਿਆ ਕਿ 1997 'ਚ ਚੋਣ ਜਿੱਤੇ। ਉਹਨਾਂ ਅਕਾਲੀ ਦਲ ਲਈ ਥਾਂ ਬਣਾਈ ਸੀ ਜਿਸ ਨੂੰ ਕੁੱਝ ਮਤਲਬ ਪ੍ਰਸਤਾਂ ਨੇ ਖੋਰਾ ਲਾ ਦਿੱਤਾ। 
ਉੱਧਰ ਚਿਰੰਜੀ ਲਾਲ ਗਰਗ ਦੇ ਸਪੁੱਤਰ ਐਡਵੋਕੇਟ ਰਾਜਨ ਗਰਗ ਆਪਣੇ ਪਿਤਾ ਨਾਲ ਵਰਤਾਏ ਗਏ ਵਰਤਾਰੇ ਤੋਂ ਪੂਰੀ  ਤਰਾਂ ਨਰਾਜ ਨਜਰ ਆਏ। ਉਹਨਾਂ ਆਖਿਆ ਕਿ ਸਾਨੂੰ ਤਾਂ ਪੌਣੇ ਪੰਜ ਸਾਲ ਤੋਂ ਹੀ ਕੱਢਿਆ ਹੋਇਆ ਸੀ ਪਰ ਜਲੀਲ ਕਰਨਾ ਮਾੜੀ ਗੱਲ ਹੈ ਜੋ ਕਿਸੇ ਵੀ ਸਿਆਸੀ ਪਾਰਟੀ ਦੇ ਵੱਡੇ ਆਗੂ ਨੂੰ ਸ਼ੋਭਾ ਨਹੀਂ ਦਿੰਦੀ। ਤਿੱਖੇ ਸ਼ਬਦਾਂ ਦਾ ਪ੍ਰਗਟਾਵਾ ਕਰਦਿਆਂ ਐਡਵੋਕੇਟ ਗਰਗ ਨੇ ਸਵਾਲ ਕੀਤਾ ਕਿ ਕੀ ਭਗਤ ਸਿੰਘ ਦਾ ਕੈਲੰਡਰ ਵੰਡਣਾ ਗੁਨਾਹ ਹੈ ਜਿਸ ਨੂੰ ਮੇਰੇ ਪਿਤਾ ਦਾ ਜੁਰਮ ਬਣਾ ਦਿੱਤਾ ਗਿਆ। ਭਗਤ ਸਿੰਘ ਦੇਸ਼ ਦੀ ਸ਼ਾਨ ਹੈ। ਉਸ ਨੂੰ ਕੋਈ ਵੀ ਸਲਾਮ ਕਰ ਸਕਦਾ ਹੈ। ਉਹਨਾਂ ਆਖਿਆ ਕਿ ਭਗਤ ਸਿੰਘ ਦੇ ਸ਼ਤਾਬਦੀ ਸਮਾਗਮ ਤਾਂ ਅਕਾਲੀ-ਭਾਜਪਾ ਸਰਕਾਰ ਨੇ ਵੀ ਕਰਵਾਏ ਸਨ ਕੀ ਉਹ ਵੀ ਮਨਪ੍ਰੀਤ ਨਾਲ ਰਲੇ ਹੋਏ ਹਨ? ਐਡਵੋਕੇਟ ਗਰਗ ਨੇ ਸਥਾਨਕ ਲੀਡਰਾਂ ਨੂੰ ਛੋਟੀ ਸੋਚ ਵਾਲੇ ਦੱਸਦਿਆਂ ਆਖਿਆ ਕਿ ਪਾਰਟੀ ਨੇ ਉਹਨਾਂ ਨੂੰ ਵੱਡਾ ਮਾਣ ਦੇ ਦਿੱਤਾ ਜਿਸ ਕਰਕੇ ਉਹ ਨਿੱਜੀ ਹਿੱਤਾਂ ਨੂੰ ਪਹਿਲ ਦੇਣ ਲੱਗੇ। ਉਹਨਾਂ ਜੋਰ ਦੇ ਕੇ ਕਿਹਾ ਕਿ ਗਰਗ ਪ੍ਰੀਵਾਰ ਹੇਠਲੇ ਪੱਧਰ ਤੋਂ ਉੱਠਕੇ ਉੱਪਰ ਗਿਆ ਹੈ। ਅਸੀਂ ਵਜੀਰੀ ਲੈ ਕੇ ਵੀ ਲੋਕਾਂ 'ਚ ਵਿਚਰੇ ਤੇ ਹੁਣ ਵੀ ਉਵੇਂ ਹੀ ਜਾ ਰਹੇ ਹਾਂ ਇਸ ਲਈ ਸਾਨੂੰ ਕੋਈ ਫਰਕ ਨਹੀਂ ਪੈਣ ਲੱਗਾ। ਉਹਨਾਂ ਕਿਹਾ ਕਿ ਇਹ ਅਕਾਲੀ ਦਲ ਨੇ ਦੇਖਣਾ ਹੈ ਕਿ ਉਸ ਨੂੰ ਸ਼ਰਮਾਏਦਾਰਾਂ ਦੀ ਲੋੜ ਹੈ ਜਾਂ ਟਕਸਾਲੀ ਵਰਕਰਾਂ ਦੀ। ਜਦੋਂ ਇਸ ਨੌਜੁਆਨ ਆਗੂ ਨੂੰ ਪੀਪਲਜ਼ ਪਾਰਟੀ ਬਾਰੇ ਸਵਾਲ ਕੀਤਾ ਤਾਂ ਉਹਨਾਂ ਆਖਿਆ ਕਿ ਸਮਾਂ ਆਉਣ ਤੇ ਸਭ ਦੇਖਿਆ ਜਾਏਗਾ ਸਾਰੇ ਬਦਲ ਖੁੱਲੇ ਹਨ ਪਰ ਅੰਤਿਮ ਫੈਸਲਾ ਪਿਤਾ ਜੀ ਕਰਨਗੇ।

ਵੀ. ਆਈ. ਪੀ. ਡਿਊਟੀਆਂ ਕਾਰਨ ਸੁੱਕਣੇ ਪਈ ਪੁਲਿਸ ਮੁਲਾਜਮਾਂ ਦੀ ਜਾਨ

ਬਠਿੰਡਾ, ਅਸ਼ੋਕ ਵਰਮਾ
ਨਫਰੀ ਦੀ ਘਾਟ ਕਾਰਨ ਉਖੜੀ ਪਈ ਪੰਜਾਬ ਪੁਲਿਸ ਵੀ. ਵੀ. ਆਈ. ਪੀ. ਵਿਅਕਤੀਆਂ ਨੂੰ ਸਲੂਟ ਮਾਰਨ ਜੋਗੀ ਰਹਿ ਗਈ ਹੈ ਹਾਲਾਤ ਇਹ ਹਨ ਕਿ ਇਹਨਾਂ ਡਿਊਟੀਆਂ ਨੇ ਪੁਲਿਸ ਨੂੰ ਥਕਾ ਕੇ ਰੱਖ ਦਿੱਤਾ ਹੈ ਪਰ ਅਨੁਸ਼ਾਸ਼ਨ ਦੇ ਲੱਗੇ ਠੱਪੇ ਕਾਰਨ ਕੋਈ ਡਰਦਾ ਮਾਰਾ ਕੁਸਕ ਨਹੀਂ ਰਿਹਾ। ਮਿਸਾਲ ਦੇ ਤੌਰ 'ਤੇ ਬਠਿੰਡਾ ਪੁਲਿਸ ਲਈ ਤਾਂ ਬਾਦਲ ਪ੍ਰੀਵਾਰ ਦੇ ਗੇੜੇ ਹਊਆਂ ਬਣੇ ਹੋਏ ਹਨ ਪਰ ਉੱਪਰੋਂ ਗੋਬਿੰਦਪੁਰਾ ਵਰਗੀਆਂ ਡਿਊਟੀਆਂ ਕਾਰਨ ਕਰਮਚਾਰੀ ਸੁੱਕਣੇ ਪਏ ਹੋਏ ਹਨ। ਲੋਕ ਸਭਾ ਹਲਕਾ ਵੀ. ਆਈ. ਪੀ. ਹੋਣ ਕਰਕੇ ਜਿਆਦਾਤਰ ਮੁਲਾਜਮ ਮੈਂਬਰ ਪਾਰਲੀਮੈਂਟ ਹਰਸਿਮਰਤ ਕੌਰ ਬਾਦਲ ਦੀ ਟਹਿਲ ਸੇਵਾ 'ਚ ਜੁਟੇ ਰਹਿੰਦੇ ਹਨ। ਜਿੰਨੇ ਦਿਨ ਬਾਦਲ ਕੁਨਬਾ ਜ਼ਿਲ•ੇ 'ਚ ਰਹਿੰਦਾ ਹੈ ਤਾਂ ਸਮੁੱਚਾ ਸਿਵਲ ਪ੍ਰਸ਼ਾਸ਼ਨ ਤਾਂ ਪੱਬਾ ਭਾਰ ਰਹਿੰਦਾ ਹੀ ਹੈ ਬਲਕਿ ਪੁਲਿਸ ਨੂੰ ਵੀ ਹਾਜ਼ਰੀ ਭਰਨੀ ਪੈਂਦੀ ਹੈ ਅਤੇ ਥਾਣੇ ਭਾਂ-ਭਾਂ ਕਰਦੇ ਰਹਿੰਦੇ ਹਨ। ਰਹਿੰਦੀ ਕਸਰ ਵੀ. ਆਈ. ਪੀ. ਹਲਕਾ ਬਣਨ ਤੋਂ ਮਗਰੋਂ ਪੰਜਾਬ ਦੀਆ ਵੱਖ-ਵੱਖ ਜਥੇਬੰਦੀਆਂ ਵੱਲੋਂ ਇੱਥੇ ਕੀਤੇ ਜਾਂਦੇ ਮੁਜਾਹਰਿਆਂ ਕਾਰਨ ਨਿੱਕਲੀ ਪਈ ਹੈ। ਵੱਡਿਆਂ ਦੇ ਵਧ ਰਹੇ ਗੇੜੇ ਅਤੇ ਨਫਰੀ ਦੀ ਘਾਟ ਦਾ ਲੁਟੇਰੇ, ਝਪਟ ਮਾਰ ਅਤੇ ਚੋਰ ਖੂਬ ਲਾਭ ਉਠਾ ਰਹੇ ਹਨ ਇਹੋ ਕਾਰਨ ਹੈ ਕਿ ਪੁਲਿਸ ਨੂੰ ਸ਼ਹਿਰ 'ਚ ਹੋਏ ਅਪਰਾਧਾਂ ਦੀ ਤਫਤੀਸ਼ ਕਰਨ ਦਾ ਸਮਾਂ ਨਹੀਂ ਮਿਲਦਾ ਤੇ ਜੁਰਮਾਂ ਦਾ ਗ੍ਰਾਫ ਲਗਾਤਾਰ ਵਧਦਾ ਜਾ ਰਿਹਾ ਹੈ।
ਬਠਿੰਡਾ ਦੇ ਵਿਸ਼ਾਲ ਨਗਰ 'ਚ 9 ਅਕਤੂਬਰ ਨੂੰ ਰਿਕਸ਼ਾ ਚਾਲਕ ਦੇ ਹੋਏ ਕਤਲ ਦਾ ਮਾਮਲਾ ਦਰਜ਼ ਕਰ ਲਿਆ ਪਰ ਕੋਤਵਾਲ ਜਗਦੀਸ਼ ਲਾਲ ਅਨੁਸਾਰ ਇਸ ਘਟਨਾ ਦਾ ਹਾਲੇ ਕੋਈ ਸੁਰਾਗ ਨਹੀਂ ਮਿਲਿਆ। ਥਾਣਾ ਫੂਲ ਦੇ ਪਿੰਡ ਰਾਈਆ ਦੇ ਪੈਟਰੋਲ ਪੰਪ ਦੇ ਚੌਕੀਦਾਰ ਭਜਨ ਸਿੰਘ ਦੇ ਕਤਲ ਦਾ ਮਾਮਲਾ ਵੀ ਇਸੇ ਸ੍ਰੇਣੀ 'ਚ ਆਉਂਦਾ ਹੈ। ਥਾਣਾ ਇੰਚਾਰਜ ਕੋਲ ਜਾਂਚ ਦਾ ਵਕਤ ਨਹੀਂ ਵੀ. ਆਈ. ਪੀ. ਡਿਊਟੀ ਦੇ ਰਹੇ ਹਨ। ਰਾਮਪੁਰਾ ਫੂਲ 'ਚ ਵੀ ਆਪਣੇ ਹੀ ਦੋਸਤ ਦਾ ਕਤਲ ਕਰਨ ਵਾਲੇ ਨੌਜੁਆਨਾਂ ਨੂੰ ਪੁਲਿਸ ਗ੍ਰਿਫ਼ਤਾਰ ਨਹੀਂ ਕਰ ਸਕੀ। ਇਹੋ ਹੀ ਨਹੀਂ ਮਹਾਂਨਗਰ ਬਠਿੰਡਾ 'ਚ ਚੋਰੀਆਂ ਦੇ ਅਣਸੁਲਝੇ ਮਾਮਲਿਆਂ ਦੀ ਸੂਚੀ ਲੰਬੀ ਹੈ। ਹੈਰਾਨੀਜਨਕ ਇਹ ਵੀ ਹੈ ਕਿ ਚੋਰ ਆਪਣਾ ਕੰਮ ਜਾਰੀ ਰੱਖ ਰਹੇ ਹਨ। ਬਠਿੰਡਾ 'ਚ ਹੁਣੇ ਖਤਮ ਹੋਏ ਕਬੱਡੀ ਮੈਚ, ਗੁਜਰ ਚੁੱਕੀ ਲਾਲ ਕ੍ਰਿਸ਼ਨ ਅਡਵਾਨੀ ਦੀ ਰਥ ਯਾਤਰਾ ਅਤੇ ਕਾਂਗਰਸ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਕੀਤੀਆਂ ਜਾ ਰਹੀਆਂ ਰੈਲੀਆਂ ਲਈ ਵੀ ਪੁਲਿਸ ਨੂੰ ਪ੍ਰਬੰਧ ਕਰਨੇ ਪਏ ਹਨ। ਇਹਨਾਂ ਚੱਕਰਾਂ 'ਚ ਕਈ ਵਾਰ ਜ਼ਿਲ•ਾ ਪੁਲਿਸ ਦੇ ਦਫਤਰ ਐਤਵਾਰ ਨੂੰ ਵੀ ਖੁੱਲਦੇ ਹਨ। ਜ਼ਿਲ•ਾ ਦਫਤਰਾਂ ਵਿਚਲੇ ਕਲੈਰੀਕਲ ਸਟਾਫ ਵੀ ਤਾਇਨਾਤ ਕੀਤਾ ਜਾਂਦਾ ਹੈ। ਪੁਲਿਸ ਮੁਲਾਜਮਾਂ ਨੂੰ ਗਿਲਾ ਹੈ ਕਿ ਪਿਛਲੇ ਡੀ. ਜੀ. ਪੀ. ਰਿਜਰਵ ਫੋਰਸ ਦੀ ਇੱਕ ਬਟਾਲੀਅਨ ਦਾ ਵਾਅਦਾ ਕਰਕੇ ਗਏ ਸਨ ਜੋ ਕਿ ਅਜੇ ਤੱਕ ਵਫਾ ਨਹੀਂ ਹੋਇਆ। ਸਿਆਸਤਦਾਨ ਤੇ ਉੱਚ ਅਧਿਕਾਰੀ ਪੁਲਿਸ ਨੂੰ ਜਨਤਾਂ ਦੀ ਸੇਵਕ ਦੱਸਦੇ ਨਹੀਂ ਥੱਕਦੇ ਪਰ ਪੰਜਾਬ ਪੁਲਿਸ ਦੇ ਮੁਲਾਜਮਾਂ ਦੇ ਰੁਝੇਵੇ ਹਨ ਉਸ ਨੂੰ ਲੋਕਾਂ ਦੇ ਮਸਲੇ ਹੱਲ ਕਰਨ ਲਈ ਬੜਾ ਘੱਟ ਸਮਾਂ ਮਿਲਦਾ ਹੈ। ਵੀ. ਆਈ. ਪੀ. ਡਿਊਟੀਆਂ ਨੇ ਪੁਲਿਸ ਨੂੰ ਐਨਾਂ ਉਲਝਾਇਆ ਹੋਇਆ ਹੈ ਕਿ ਜਾਂਚ ਅਧਿਕਾਰੀਆਂ ਕੋਲ ਫੌਜਦਾਰੀ ਮਾਮਲਿਆਂ ਦੀ ਪੜਤਾਲ ਲਈ ਵੀ ਢੁੱਕਵਾਂ ਸਮਾਂ ਨਹੀਂ ਹੈ।
ਇੱਕ ਅਧਿਐਨ ਦੌਰਾਨ ਇਹ ਸਾਹਮਣੇ ਆਇਆ ਹੈ ਕਿ ਪੁਲਿਸ ਆਮ ਲੋਕਾਂ ਦੀਆਂ ਸਮੱਸਿਆਵਾਂ ਸੁਣਨ ਲਈ ਇੱਕ ਦਿਨ 'ਚ 47 ਮਿੰਟ ਦਾ ਸਮਾਂ ਦਿੰਦੀ ਹੈ। ਸ਼ਿਕਾਇਤਾਂ ਦੀ ਤਫਤੀਸ਼ ਲਈ 20 ਮਿੰਟ ਦਾ ਸਮਾਂ ਹੁੰਦਾ ਹੈ ਜਦੋਂ ਕਿ ਅਤੀ ਜਿੰਮੇਵਾਰੀ ਵਾਲੇ ਫੌਜਦਾਰੀ ਕੇਸਾਂ ਦੀ ਪੜਤਾਲ ਲਈ ਵੀ ਮੁਸ਼ਕਿਲ ਨਾਲ ਉਸ ਕੋਲ 24 ਘੰਟਿਆਂ 'ਚੋਂ 47 ਮਿੰਟ ਬਚਦੇ ਹਨ। ਪੰਜਾਬ ਪੁਲਿਸ ਵੱਲੋਂ ਇਹ ਅਧਿਐਨ ਲੁਧਿਆਣਾ, ਜਲੰਧਰ ਅਤੇ ਕਪੂਰਥਲਾ ਜ਼ਿਲਿ•ਆਂ ਵਿਚਲੇ ਥਾਣਿਆਂ 'ਚ ਤਾਇਨਾਤ ਫੋਰਸ ਦੇ 24 ਘੰਟਿਆਂ ਦੇ ਕੰਮ ਦੇ ਮੁਲਾਂਕਣ ਦੇ ਅਧਾਰ ਤੇ ਹੈ। ਅਧਿਐਨ ਮੁਤਾਬਿਕ ਪੁਲਿਸ ਕਰਮਚਾਰੀਆਂ ਤੇ ਬੋਝ ਐਨਾਂ ਜਿਆਦਾ ਹੈ ਕਿ ਇੱਕ ਐਸ. ਐਚ. ਓ. ਨੂੰ ਰੋਜ਼ਾਨਾ 18 ਘੰਟੇ, ਹੋਰ ਥਾਣੇਦਾਰਾਂ ਨੂੰ 17 ਘੰਟੇ ਅਤੇ ਸਿਪਾਹੀਆਂ ਨੂੰ 15 ਘੰਟੇ ਡਿਊਟੀ ਦੇਣੀ ਪੈਂਦੀ ਹੈ। ਤਾਜਾ ਹਾਲਾਤ ਇਹ ਹਨ ਕਿ ਮੁਲਾਜਮਾਂ ਦੀ ਹਫਤਾਵਰੀ ਛੁੱਟੀ ਵੀ. ਆਈ. ਪੀ. ਡਿਊਟੀਆਂ ਦੀ ਭੇਟ ਚੜ• ਜਾਂਦੀ ਹੈ। 
ਇੱਕ ਅਨੁਮਾਨ ਅਨੁਸਾਰ ਪੰਜਾਬ ਪੁਲਿਸ ਦੇ ਸਿਪਾਹੀ ਤੋਂ ਲੈ ਕੇ ਥਾਣਾ ਇੰਚਾਰਜ ਤੱਕ ਦੇ ਮੁਲਾਜਮਾਂ ਨੂੰ ਇੱਕ ਦਿਨ 'ਚ ਔਸਤ 366 ਮਿੰਟ ਸਿਆਸਤਦਾਨਾਂ ਦੀ ਸੇਵਾ ਅਤੇ ਅਮਨ ਕਾਨੂੰਨ ਲਈ ਕੱਢਣੇ ਪੈਂਦੇ ਹਨ। ਅਧਿਐਨ ਮੁਤਾਬਿਕ ਕਰਮਚਾਰੀਆਂ ਨੂੰ ਇਹ ਦੋਵੇਂ ਡਿਊਟੀਆਂ ਤਕਰੀਬਨ ਬਰਾਬਰ-ਬਰਾਬਰ ਦੇਣੀਆਂ ਪੈ ਰਹੀਆਂ ਹਨ। ਅਧਿਐਨ ਦੌਰਾਨ ਇਹ ਵੀ ਪਤਾ ਲੱਗਾ ਹੈ ਕਿ ਪੁਲਿਸ 'ਚ ਸਭ ਤੋਂ ਘੰਟ ਤਨਖਾਹ ਤੇ ਕੰਮ ਕਰਨ ਵਾਲਿਆਂ ਨੂੰ ਦੂਸਰੇ ਅਹੁਦਿਆਂ ਦੇ ਮੁਕਾਬਲੇ ਜਿਆਦਾ ਸਮਾਂ ਡਿਊਟੀ ਦੇਣੀ ਪੈਂਦੀ ਹੈ। ਆਪਣਾ ਨਾਂਅ ਗੁਪਤ ਰੱਖਣ ਦੀ ਸ਼ਰਤ ਤੇ ਇੱਕ ਅਧਿਕਾਰੀ ਨੇ ਇਹ ਕਬੂਲ ਕੀਤਾ ਹੈ ਕਿ ਵੱਡੀ ਗਿਣਤੀ ਪੁਲਿਸ ਕਰਮੀ ਰਾਜਨੀਤੀਵਾਨਾਂ, ਸੀਨੀਅਰ ਪੁਲਿਸ ਤੇ ਸਿਵਲ ਅਧਿਕਾਰੀਆਂ ਅਹਿਮ ਵਿਅਕਤੀਆਂ ਅਤੇ ਹਾਕਮ ਧਿਰਾਂ ਦੇ ਹਾਰੇ ਹੋਏ ਆਗੂਆਂ ਦੀ ਆਓ ਭਗਤ ਤੇ ਲੱਗੇ ਰਹਿੰਦੇ ਹਨ ਜਿਸ ਕਰਕੇ ਸ਼ਿਕਾਇਤਾਂ ਜਾਂ ਤਫਤੀਸ਼ਾਂ ਲਈ ਸਮਾਂ ਹੀ ਕਿੱਥੇ ਬਚਦਾ ਹੈ। ਅਧਿਕਾਰੀਆਂ ਦਾ ਤਰਕ ਹੈ ਕਿ ਗਿਣਤੀ ਘੱਟ ਕਰਕੇ ਮੁਲਾਜਮ ਵੱਧ ਡਿਊਟੀ ਦਿੰਦੇ ਹਨ ਜਦੋਂ ਕਿ ਆਲ•ਾ ਮਿਆਰੀ ਸੂਤਰ ਦੱਸਦੇ ਹਨ ਕਿ ਕੌਮੀ ਪੱਧਰ ਤੇ 1 ਲੱਖ ਦੀ ਅਬਾਦੀ ਪਿੱਛੇ 126 ਪੁਲਿਸ ਕਰਮਚਾਰੀ ਹਨ ਪਰ ਪੰਜਾਬ 'ਚ ਇਹ ਅੰਕੜਾ 276 ਤੋਂ ਵੀ ਜਿਆਦਾ ਹੈ। ਸੂਤਰਾਂ ਮੁਤਾਬਿਕ 10 ਹਜ਼ਾਰ ਮੁਲਾਜਮ ਤਾਂ ਕੇਵਲ ਸਿਆਸਤਦਾਨਾਂ, ਸਿਵਲ ਤੇ ਪੁਲਿਸ ਅਧਿਕਾਰੀਆਂ ਅਤੇ ਅਹਿਮ ਲੋਕਾਂ ਦੀ ਸੁਰੱਖਿਆ ਲਈ ਤਾਇਨਾਤ ਹਨ ਜੋ ਕਿ ਸਾਰੇ ਪੁਆੜੇ ਦੀ ਜੜ ਹੈ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਜਿਸ ਨੂੰ ਜਰੂਰਤ ਹੈ ਸੁਰੱਖਿਆ ਦਿੱਤੀ ਜਾਣੀ ਚਾਹੀਦੀ ਹੈ ਪਰ ਇੱਥੇ ਤਾਂ ਸਿਆਸੀ ਲੋਕਾਂ ਨੇ ਟੌਹਰ ਦੀ ਖਾਤਰ ਗੰਨਮੈਨ ਲੈ ਰੱਖੇ ਹਨ। ਇਹੋ ਹੀ ਨਹੀਂ 'ਬੜੇ ਮੀਆਂ ਸੋ ਬੜੇ ਮੀਆਂ ਛੋਟੇ ਮੀਆਂ ਸੁਭਾਨ ਅੱਲਾ' ਦੀ ਕਹਾਵਤ ਨੂੰ ਸਾਰਥਿਕ ਕਰਦਿਆਂ ਮੰਤਰੀ ਤਾਂ ਇੱਕ ਪਾਸੇ ਪੰਜਾਬ 'ਚ ਤਾਂ ਜ਼ਿਲਿ•ਆਂ ਦੇ ਡਿਪਟੀ ਕਮਿਸ਼ਨਰਾਂ ਅੱਗੇ ਪੁਲਿਸ ਦੀ ਜਿਪਸੀ ਚਲਦੀ ਹੈ ਜਿਸ ਨਾਲ ਕੰਮ ਅਤੇ ਪੈਸਾ ਦੋਵੇਂ ਖਰਾਬ ਹੋ ਰਹੇ ਹਨ। ਇਸ ਸਬੰਧੀ ਰਾਜ ਦੇ ਗ੍ਰਹਿ ਵਿਭਾਗ ਦੇ ਇੱਕ ਅਧਿਕਾਰੀ ਨੇ ਦਲੀਲ ਦਿੱਤੀ ਕਿ ਨਵੇਂ ਭਰਤੀ ਕੀਤੇ ਨੌਜੁਆਨਾਂ ਦੇ ਸੇਵਾ ਸੰਭਾਲਣ ਤੋਂ ਬਾਅਦ ਸਥਿਤੀ ਠੀਕ ਹੋ ਜਾਏਗੀ। 
ਜ਼ਿਲ•ਾ ਬਠਿੰਡਾ ਦੇ ਸੀਨੀਅਰ ਪੁਲਿਸ ਕਪਤਾਨ ਡਾ. ਸੁਖਚੈਨ ਸਿੰਘ ਗਿੱਲ ਦਾ ਕਹਿਣਾ ਸੀ ਕਿ ਪੁਲਿਸ ਫੋਰਸ ਦਾ ਮੰਤਵ ਹੀ ਅਮਨ ਕਾਨੂੰਨ ਅਤੇ ਵੀ. ਆਈ. ਪੀ. ਦੀ ਸੁਰੱਖਿਆ ਹੈ ਉਹਨਾਂ ਆਖਿਆ ਕਿ ਮੈਨ ਪਾਵਰ ਘੱਟ ਹੋਣ ਕਰਕੇ ਥੋੜ•ੀ ਪ੍ਰੇਸ਼ਾਨੀ ਜਰੂਰ ਹੈ ਪਰ ਹਾਲਾਤ ਕਾਬੂ ਤੋਂ ਬਾਹਰ ਨਹੀਂ ਫਿਰ ਵੀ ਸਥਿਤੀ ਨੂੰ ਸਥਿਰ ਰੱਖਣ ਦੀ ਕੋਸ਼ਿਸ਼ ਜਾਰੀ ਹੈ।

ਪਹਿਲਾਂ ਨਾਲੋਂ ਬਹੁਤ ਬਦਲ ਗਿਆ ਹੈ ''ਬਠਿੰਡਾ''

ਅਸ਼ੋਕ ਵਰਮਾ,ਬਠਿੰਡਾ

ਬਠਿੰਡਾ ਦੀ ਮੋੜ੍ਹੀ ਕਿਸਨੇ ਗੱਡੀ ਇਸ ਦਾ ਜਵਾਬ ਇਤਿਹਾਸਕ ਧੁੰਦ 'ਚ ਹੈ। ਦੱਸਦੇ ਹਨ ਕਿ ਲਹੌਰ ਦੇ ਰਾਜੇ ਆਨੰਗਪਾਲ ਦੇ ਪੋਤੇ ਬਿਨੇਪਾਲ ਨੇ 1800 ਸਾਲ ਪਹਿਲਾਂ ਆਪਣੇ ਚਹੇਤੇ ਵਜੀਰ ਠੰਢੂ ਰਾਮ ਦੇ ਨਾਂਅ ਨਾਲ ਜੋੜਕੇ 'ਬ-ਠੰਢੂ' ਨਾਂਅ ਦਾ ਸ਼ਹਿਰ ਵਸਾਇਆ ਜੋ ਕਿ ਧੀਰੇ-ਧੀਰੇ 'ਬਠਿੰਡਾ' ਬਣ ਗਿਆ। ਕੁੱਝ ਦਾ ਵਿਚਾਰ ਹੈ ਕਿ ਬਠਿੰਡੇ ਦਾ ਸੰਸਕ੍ਰਿਤ ਨਾਂਅ 'ਵਿਕਰਮਗੜ' ਸੀ ਜਿਸ ਨੂੰ ਭੱਟੀ ਰਾਓ ਰਾਜਪੂਤ ਨੇ ਵਸਾਇਆ ਸੀ ਜਦੋਂ ਕਿ ਕਈਆਂ ਮੁਤਾਬਿਕ ਰਾਜਾ ਜੈਪਾਲ ਨੇ ਕਸ਼ਮੀਰ ਤੋਂ ਅਫਗਾਨਿਸਤਾਨ ਤੱਕ ਫੈਲੇ ਰਾਜ ਦੀ ਦੱਖਣੀ ਰਾਜਧਾਨੀ ਵਜੋਂ ਇਸ ਸ਼ਹਿਰ ਦਾ ਮੁੱਢ ਬੰਨਿਆ। ਦੱਸਦੇ ਹਨ ਕਿ ਭੱਟੀ ਰਾਜਪੂਤਾਂ ਵੱਲੋਂ ਵਸਾਏ ਜਾਣ ਕਰਕੇ ਇਸਦਾ ਨਾਂਅ ਭਟਿੰਡਾ ਸੀ ਜੋ ਕਿ ਲੰਬਾ ਸਮਾਂ ਚਲਦਾ ਰਿਹਾ ਜਿਸ ਨੂੰ ਬਦਲ ਕੇ ਸਰਕਾਰ ਨੇ ਬਠਿੰਡਾ ਕਰ ਦਿੱਤਾ। ਆਖਿਆ ਇਹ ਵੀ ਜਾਂਦਾ ਹੈ ਕਿ ਬਠਿੰਡਾ ਤਾਂ ਬੀਕਾਨੇਰ ਦੇ ਬਨਵਾਸੀ ਸ਼ਹਿਜਾਦੇ 'ਬੀਕਾ' ਨੇ ਵਸਾਇਆ ਸੀ। ਬਠਿੰਡਾ ਦੀ ਧੁੰਨੀ 'ਚ ਸ਼ਹਿਰ ਦੇ ਐਨ ਵਿਚਕਾਰ 15 ਏਕੜ ਰਕਬੇ 'ਚ 150 ਫੁੱਟ ਉੱਚਾ ਲਾਹੌਰ, ਫਿਲੌਰ ਤੇ ਹਨੂੰਮਾਨਗੜ੍ਹ ਦੇ ਕਿਲਿਆਂ ਤੋਂ ਵੀ ਵੱਡਾ ਕਿਲਾ ਬਣਿਆ ਹੋਇਆ ਹੈ ਜੋ ਕਿ ਸ਼ਹਿਰ ਦੀ ਸ਼ਾਹੀ ਤਬੀਅਤ ਦੀ ਜਾਮਨੀ ਭਰਦਾ ਹੈ। ਵਿਸ਼ਾਲ ਫਸੀਲਾਂ ਵਾਲਾ ਇਹ ਕਿਲਾ ਬੇਸ਼ੱਕ ਅੱਜ ਕੱਲ ਇੱਟ-ਇੱਟ ਹੋ ਕੇ ਖਿੰਡ ਰਿਹਾ ਹੈ ਪਰ ਕਦੇ ਇਸਤੇ ਬੈਨੀਪਾਲ ਤੋਂ ਲੈ ਕੇ ਸ਼ੇਖ ਸਲੀਮ, ਫੌਲਾਦ ਤੁਬਰਚਾ, ਅਲਤੂਨੀਆਂ, ਬਾਬਾ ਆਲਾ ਸਿੰਘ, ਮਹਾਰਾਜਾ ਕਰਮ ਸਿੰਘ ਪਟਿਆਲ ਤੱਕ, ਪਤਾ ਨਹੀਂ ਕਿੰਨਿਆਂ ਸ਼ਾਸਕਾਂ ਦੇ ਝੰਡੇ ਝੁੱਲੇ ਹਨ। ਇਸ ਕਿਲੇ ਦੇ ਨਾਲ ਤੇਰਵੀਂ ਸਦੀ ਦੇ ਭਾਰਤ ਦੀ ਪਹਿਲੀ ਮਹਿਲਾ ਸ਼ਾਸ਼ਕ ਰਜੀਆ ਸੁਲਤਾਨ ਵੱਲੋਂ ਕਿਲੇ ਦੀ ਕਿਸੇ ਮਮਟੀ ਤੋਂ ਛਾਲ ਮਾਰਕੇ  ਖੁਦਕਸ਼ੀ ਦੀ ਕਥਾ ਵੀ ਜੁੜੀ ਹੋਈ ਹੈ। ਭਾਵੇਂ ਕਿਲੇ ਦੀਆਂ ਵੀਰਾਨ ਹੋਈਆਂ ਪੌੜੀਆਂ ਚੜਕੇ ਕਿਲੇ ਦੀ ਮਮਟੀ ਤੋਂ ਸ਼ਹਿਰ ਦੇ ਮੁੱਢ ਤੋਂ ਵਰਤਮਾਨ ਦਾ ਅਹਿਸਾਸ ਹੁੰਦਾ ਹੈ ਪਰ ਕਿਲੇ ਦੇ ਸੰਦਲੀ ਦਰਵਾਜੇ ਦੇ ਸਾਹਮਣੇ ਮੈਦਾਨ 'ਚ ਗੁੱਲੀ ਡੰਡਾ ਖੇਡਕੇ ਬਾਲਪਨ ਤੋਂ ਬੁਢਾਪੇ ਦੀ ਦਹਿਲੀਜ ਤੇ ਪੁੱਜ ਚੁੱਕੇ ਬਜ਼ੁਰਗ ਵੀ ਮੰਨਦੇ ਹਨ ਕਿ ਹੁਣ ਬਠਿੰਡਾ ਬਦਲ ਗਿਆ ਹੈ ਤੇ ਬਦਲ ਰਿਹਾ ਹੈ। 70ਵਿਆਂ 'ਚ ਇੱਕ ਬੱਸ ਦੇ ਲੰਘਣ ਜੋਗੀ ਸੜਕ ਚਹੁੰਮਾਰਗੀ ਹੋ ਗਈ ਹੈ। ਇਹ ਤਾਂ ਪਤਾ ਨਹੀਂ ਕਿ ਇਸ ਦੇ ਸੱਟਾ ਬਜ਼ਾਰ 'ਚ ਹਾਲੇ ਵੀ ਲੁਕ ਛਿਪ ਕੇ ਸੱਟਾ ਹੁੰਦਾ ਹੈ ਕਿ ਨਹੀਂ ਪਰ ਇਸਦੇ ਸਿਰਕੀ ਬਜ਼ਾਰ 'ਚ ਸਿਰਕੀਆਂ ਨਹੀਂ ਵਿਕਦੀਆਂ ਅਤੇ ਧੋਬੀ ਬਜ਼ਾਰ 'ਚ ਧੋਬੀ ਨਹੀਂ ਰਹੇ ਬਲਕਿ ਇਹਨਾਂ ਬਜ਼ਾਰਾਂ 'ਚ ਲਿਸ਼-ਲਿਸ਼ ਕਰਦੇ ਦਿਓ ਕੱਦ ਇਲਕਟ੍ਰਾਨਿਕਸ, ਸੁਗੰਧੀਦਾਰ ਵਸਤਾਂ ਤੇ ਖਾਣ-ਪੀਣ ਵਾਲੇ ਪਦਾਰਥਾਂ ਵਾਲੇ ਦਿਓ ਕੱਦ ਸ਼ੋਅ ਰੂਮਾਂ ਨੇ ਲੈ ਲਈ ਹੈ। ਉੱਤਰ ਵਿੱਚ ਗੁਰੂ ਨਾਨਕ ਦੇਵ ਥਰਮਲ ਪਲਾਂਟ ਤੇ ਕੌਮੀ ਖਾਦ ਕਾਰਖਾਨੇ ਦੀਆਂ ਚਿਮਨੀਆਂ 'ਚੋਂ ਨਿੱਕਲਿਆ ਧੂੰਆਂ, ਇਹਨਾਂ ਦੇ ਨਜਦੀਕ ਬਣੀਆਂ ਝੀਲਾਂ, ਉੱਤਰੀ ਭਾਰਤ ਰੇਲਵੇ ਜੰਕਸ਼ਨ ਅਤੇ ਹਜ਼ਾਰਾਂ ਏਕੜਾਂ 'ਚ ਫੈਲੀ ਏਸ਼ੀਆ ਦੀ ਸਭ ਤੋਂ ਵੱਡੀ ਫੌਜੀ ਛਾਉਣੀ 'ਬਠਿੰਡੇ' ਦੀ ਵਿਲੱਖਣਤਾ ਦਾ ਅਹਿਸਾਸ ਦਿਵਾਉਂਦੀ ਹੈ। ਇਹਨਾਂ ਗੱਲਾਂ ਕਰਕੇ ਹੀ ਇਸ ਸ਼ਹਿਰ ਦਾ ਮੌਸਮ ਤਬਦੀਲ ਹੋ ਗਿਆ ਹੈ। ਕਦੇ ਇੱਥੋਂ ਦਾ ਕੱਕਾ ਰੇਤਾ ਇਸ ਦੀ ਪਛਾਣ ਹੁੰਦਾ ਸੀ ਪਰ ਹੁਣ ਇਸਦੀ ਥਾਂ ਹਰਿਆਲੇ ਪਾਰਕਾਂ ਨੇ ਲੈ ਲਈ ਹੈ। ਦੱਸਣ ਵਾਲਿਆਂ ਅਨੁਸਾਰ ਇਹ ਸ਼ਹਿਰ ਰੇਲਵੇ ਰਾਹੀਂ 1890 'ਚ ਤੇ ਸੜਕ 1952 'ਚ ਜੁੜ ਸਕਿਆ ਪਰ ਕਲਾ ਦੇ ਖੇਤਰ 'ਚ ਇਸਦੀ ਹੋਂਦ ਬਾਹਰਲੇ ਸੰਸਾਰ ਨਾਲ ਪੁਰਾਤਨ ਵੇਲਿਆਂ ਤੋਂ ਜੁੜੀ ਚੱਲੀ ਆ ਰਹੀ ਹੈ। 1943 'ਚ ਬਣੀ ਫਿਲਮ 'ਸੱਸੀ ਪੁੰਨੂੰ' ਦਾ ਸੰਗੀਤ ਨਿਰਦੇਸ਼ਕ ਧੁੰਮੇ ਖਾਨ ਤੇ ਸੰਗੀਤ ਨਿਰਦੇਸ਼ਕ ਗੋਬਿੰਦ ਰਾਮ ਬਠਿੰਡੇ ਦੇ ਸਨ। ਇਸ ਸ਼ਹਿਰ ਨੇ ਤਾਂ ਹਾਲੇ ਤੱਕ ਪੰਜਾਬੀ ਓਪੇਰੇ ਦੀ ਪਿਰਤ ਵੀ ਸਾਂਭੀ ਹੋਈ ਹੈ ਪਰ ਅੱਜ ਕੱਲ੍ਹ ਇੱਥੋਂ ਦੇ ਮਾਪਿਆਂ ਨੇ ਆਪਣੀ ਔਲਾਦ ਨੂੰ ਕਲਾਕਾਰ ਦੀ ਥਾਂ ਡਾਕਟਰ ਅਤੇ ਵਕੀਲ ਬਣਾਉਣ ਵੱਲ ਜਿਆਦਾ ਜੋਰ ਲਗਾ ਦਿੱਤਾ ਹੈ ਜਿਸ ਕਰਕੇ ਕਲਾਤਮਕ ਰੌਸ਼ਨੀ ਕੁੱਝ ਮੱਠੀ ਪੈ ਗਈ ਹੈ ਤਾਂਹੀਓ ਪੰਜਾਬੀ ਸਾਹਿਤ ਦੇ ਪਾਠਕ ਇਸ ਨੂੰ ਬਲਵੰਤ ਗਾਰਗੀ, ਬੂਟਾ ਸਿੰਘ ਸ਼ਾਦ ਤੇ ਮਿਹਰ ਮਿੱਤਲ ਨਾਲ ਯਾਦ ਕਰਦੇ ਹਨ ਤੇ ਕਈਆਂ ਦੇ ਜਿਹਨ 'ਚ ਅਜੇ ਵੀ ਬਠਿੰਡਾ ਦੀਆਂ ਕਚਿਹਰੀਆਂ 'ਚ ਚਲਦੇ ਕਤਲਾਂ ਦੇ ਮੁਕੱਦਮਿਆਂ ਅਤੇ ਭਰਵੀਆਂ ਬੰਦੂਕਾਂ ਦੇ ਨਕਸ਼ ਵੀ ਉੱਤਰੇ ਹੋਏ ਹਨ। ਕੋਈ ਸਮਾਂ ਸੀ ਜਦੋਂ ਸੂਰਜ ਦੀ ਟਿੱਕੀ ਛਿਪਦਿਆਂ ਹੀ ਸ਼ਹਿਰ 'ਚ ਸਨਾਟਾ ਛਾ ਜਾਂਦਾ ਸੀ ਪਰ ਹੁਣ ਰਾਤ ਤੱਕ ਲੋਕ ਸੜਕਾਂ ਤੇ ਸੈਰ ਕਰਦੇ ਹਨ। ਫਲਾਈ ਓਵਰਾਂ ਤੇ ਚਲਦੀ ਦਿਨ ਰਾਤ ਆਵਾਜਾਈ ਅਤੇ ਰੇਲ ਗੱਡੀਆਂ ਦੀਆਂ ਚੀਕਾਂ ਦੀ ਅਵਾਜ ਦੱਸਦੀ ਹੈ ਕਿ ਸ਼ਹਿਰ ਦਾ ਦਿਲ 24 ਘੰਟੇ ਧੜਕਦਾ ਹੈ। ਜੇਕਰ ਬਠਿੰਡਾ 'ਚ ਚਲਦੇ ਧਰਨੇ/ਮੁਜ਼ਾਹਰਿਆਂ ਨੂੰ ਛੱਡ ਦਿੱਤਾ ਜਾਵੇ ਤਾਂ ਸਪੱਸ਼ਟ ਹੋ ਜਾਵੇਗਾ ਕਿ ਸ਼ਹਿਰ ਆਪ ਵੀ ਸਹਿਜ ਚਾਲੇ ਚਲਦਾ ਰਹਿੰਦਾ ਹੈ ਕਿਉਂਕਿ ਪਹਿਲਾਂ ਨਾਲੋਂ ਤਾਂ ਬਠਿੰਡਾ ਬਹੁਤ ਜ਼ਿਆਦਾ ਬਦਲ ਗਿਆ ਹੈ ਤੇ ਬਦਲ ਵੀ ਰਿਹਾ ਹੈ।

ਪੁਲਿਸ ਵੱਲੋਂ ਬੇਰੁਜ਼ਗਾਰਾਂ ਤੇ ਸੰਘਰਸ਼ਸੀਲ ਲੋਕਾਂ ਨੂੰ ਝੰਬਣ ਦਾ ਮਾਮਲਾ ਸਰਕਾਰ ਦੇ ਗਲੇ ਦੀ ਹੱਡੀ ਬਣਿਆਂ

ਫਾਇਲ ਫੋਟੋ

ਬਠਿੰਡਾ, ਅਸ਼ੋਕ ਵਰਮਾ

ਪੰਜਾਬ 'ਚ ਬੀਤੀਆਂ ਵਿਧਾਨ ਸਭਾ ਚੋਣਾਂ ਵੇਲੇ ਸੱਤਾਧਾਰੀਆਂ ਵੱਲੋਂ ਜਾਰੀ ਚੋਣ ਮਨੋਰਥ ਪੱਤਰ ਦਾ ਹਵਾਲਾ ਦਿੰਦਿਆਂ ਬੇਰੁਜ਼ਗਾਰ ਧਿਰਾਂ, ਅਧਿਆਪਕਾਂ, ਮਜ਼ਦੂਰਾਂ ਅਤੇ ਖੇਤੀ ਨਾਲ ਸਬੰਧਿਤ ਮਸਲਿਆਂ ਨੂੰ ਲੈ ਕੇ ਕੀਤੇ ਜਾ ਰਹੇ ਸੰਘਰਸ਼ ਮੌਕੇ  ਚੋਣਾਂ ਦੀ ਹੋਣੀ ਕੂਕਣ ਸਾਰ ਪੰਜਾਬ ਪੁਲਿਸ ਵੱਲੋਂ ਫੇਰੀ ਜਾ ਰਹੀ ਡਾਂਗ ਸਰਕਾਰ ਦੇ ਗਲੇ ਦੀ ਹੱਡੀ ਬਣਦੀ ਦਿਖਾਈ ਦੇ ਰਹੀ ਹੈ। ਸਿਆਸੀ ਮਾਹਿਰਾਂ ਦਾ ਮੰਨਣਾ ਹੈ ਕਿ ਹੁਣ ਜਦੋਂ ਪੰਜਾਬ ਦੇ ਚੋਣ ਜਾਬਤੇ ਦੀ ਮਾਰ ਹੇਠ ਆਉਣ 'ਚ ਕੋਈ ਬਹੁਤਾ ਸਮਾਂ ਨਹੀਂ ਰਹਿ ਗਿਆ ਹੈ ਤਾਂ ਵਾਰ-ਵਾਰ ਅਜਿਹੇ ਵਰਤਾਰਿਆਂ 'ਚ ਆਈ ਤੇਜੀ ਸਰਕਾਰ ਲਈ ਘਾਟੇ ਦਾ ਸੌਦਾ ਸਿੱਧ ਹੋ ਸਕਦੀ ਹੈ। ਫਰੀਦਕੋਟ ਵਿਖੇ ਮੁੱਖ ਮੰਤਰੀ ਦੇ ਸੰਗਤ ਦਰਸ਼ਨ 'ਚ ਬੇਰੁਜ਼ਗਾਰ ਲਾਈਨਮਨਾਂ ਵੱਲੋਂ ਕੀਤੀ ਨਾਅਰੇਬਾਜੀ ਅਤੇ ਟੈਕਨੀਕਲ ਸਰਵਿਸ ਯੂਨੀਅਨ ਦੀ ਅਗਵਾਈ 'ਚ ਕਾਲੇ ਝੰਡੇ ਦਿਖਾ ਰਹੇ ਬਿਜਲੀ ਕਾਮਿਆਂ ਨੂੰ ਥਾਣਾ ਸਿਟੀ ਦੇ ਐਸ. ਐਚ. ਓ. ਗੁਰਸ਼ੇਰ ਸਿੰਘ ਅਤੇ ਹੌਲਦਾਰ ਬੋਹੜ ਸਿੰਘ ਵੱਲੋਂ ਮੋਹਰੀ ਹੋ ਕੇ ਚਾੜੇ ਗਏ ਕੁਟਾਪੇ ਨੇ ਸੱਤਾਧਾਰੀ ਧਿਰਾਂ ਦਾ ਗ੍ਰਾਫ ਨੀਵਾਂ ਕੀਤਾ ਹੈ। ਇਹੋ ਹੀ ਨਹੀਂ ਬਠਿੰਡਾ 'ਚ ਬੀਤੇ ਦਿਨੀਂ ਈ. ਟੀ. ਟੀ. ਅਧਿਆਪਕਾਂ ਨੂੰ ਚਾੜਿਆ ਕੁਟਾਪਾ, ਗੋਬਿੰਦਪੁਰਾ ਜਮੀਨੀ ਮਾਮਲੇ ਨੂੰ ਲੈ ਕੇ ਕਿਸਾਨਾਂ ਤੇ ਮਜ਼ਦੂਰਾਂ ਦੀ ਪੁਲਿਸ ਵੱਲੋਂ ਕੀਤੀ ਕੁੱਟਮਾਰ ਅਤੇ ਬਠਿੰਡਾ ਵਿਖੇ ਬੀਬੀ ਹਰਸਿਮਰਤ ਕੌਰ ਬਾਦਲ ਨੂੰ ਆਪਣੀ ਫਰਿਆਦ ਸੁਣਾਉਣ ਲਈ ਇਕੱਠੇ ਹੋਏ ਬੇਰੁਜ਼ਗਾਰ ਮੁੰਡੇ-ਕੁੜੀਆਂ ਦੀ ਪੁਲਿਸ ਤੇ ਬੀਬੀ ਦੇ ਸੁਰੱਖਿਆ ਗਾਰਡਾਂ ਵੱਲੋਂ ਕੀਤੀ ਗਈ ਖਿੱਚ ਧੂਹ ਤੇ ਅਕਾਲੀ ਵਰਕਰਾਂ ਵੱਲੋਂ ਕੀਤੀ ਗਈ ਪਰੇਡ ਤੋਂ ਇਲਾਵਾ ਮੁੱਖ ਮੰਤਰੀ ਦੇ ਹਲਕੇ ਲੰਬੀ ਜਾਂ ਜੱਦੀ ਪਿੰਡ ਬਾਦਲ ਵੱਲ ਮਾਰਚ ਕਰਨ ਵਾਲਿਆਂ ਨੂੰ ਪੁਲਿਸ ਵੱਲੋਂ ਝੰਬੇ ਜਾਣ ਦੀਆਂ ਛਪਦੀਆਂ ਤਸਵੀਰਾਂ ਨਾਲ ਸਮੁੱਚੇ ਰਾਜ ਪ੍ਰਬੰਧ ਦੀ ਦਿੱਖ ਦਾਅ ਤੇ ਲੱਗੀ ਹੋਈ ਹੈ। ਪਰ ਤਸਵੀਰ ਦਾ ਸਿਆਹ ਪੱਖ ਇਹ ਹੈ ਕਿ ਅਧਿਕਾਰੀ ਆਪਣੇ ਸਿਆਸੀ ਅਕਾਵਾਂ ਦੇ ਫਰਮਾਨ ਨੂੰ ਸਿਰ ਮੱਥੇ ਮੰਨਦਿਆਂ 'ਰਾਜ ਨਹੀਂ ਸੇਵਾ' ਦੇ ਨਾਅਰੇ ਨੂੰ ਅਮਲੀ ਰੂਪ ਦੇਣ 'ਚ ਲੱਗੇ ਹੋਏ ਹਨ। ਹਾਲਾਂਕਿ ਫਰੀਦਕੋਟ ਮਾਮਲੇ ਨੂੰ ਲੈ ਕੇ ਸਰਕਾਰ ਨੇ ਐਸ. ਐਚ. ਓ. ਤੇ ਹੌਲਦਾਰ ਖਿਲਾਫ ਮੁਕੱਦਮਾਂ ਅਤੇ ਡੀ. ਐਸ. ਪੀ. ਦੀ ਬਦਲੀ ਕਰਕੇ ਗੋਂਗਲੂਆਂ ਤੋਂ ਮਿੱਟੀ ਝਾੜਨ ਦੀ ਕੋਸ਼ਿਸ਼ ਕੀਤੀ ਹੈ ਪਰ ਪੰਜਾਬ ਦੀਆਂ ਬਾਕੀ ਥਾਵਾਂ 'ਤੇ ਅਜਿਹੇ ਮੁੱਦਿਆਂ ਨੂੰ ਲੈ ਕੇ ਕੋਈ ਕਦਮ ਨਾ ਉਠਾਏ ਜਾਣ ਦੇ ਸਿੱਟੇ ਵਜੋਂ ਨਰਾਜਗੀਆਂ ਦੀਆਂ ਆ ਰਹੀਆਂ ਖ਼ਬਰਾਂ ਦੱਸਦੀਆਂ ਹਨ ਕਿ ਨਿੱਤ-ਨਿੱਤ ਦੇ ਡਾਂਗੋ-ਸੋਟੇ ਨੇ ਪੁਲਿਸ ਦਾ ਅਕਸ ਖਰਾਬ ਕੀਤਾ ਹੈ। ਆਮ ਲੋਕ ਇਸ ਗੱਲ ਨੂੰ ਲੈ ਕੇ ਵੀ ਗੁੱਸੇ 'ਚ ਹਨ ਕਿ ਜਿਸ ਵਿਅਕਤੀ ਨੂੰ ਉਹਨਾਂ ਚੁਣਕੇ ਸੂਬੇ ਦੀ ਵਾਂਗਡੋਰ ਸੰਭਾਲੀ ਉਸ ਨੂੰ ਆਪਣਾ ਦੁੱਖ ਦੱਸਣ ਲਈ ਜਾਣ ਵਾਲਿਆਂ ਨੂੰ ਪੁਲਿਸ ਵੱਲੋਂ ਸਖਤ ਨਾਕਾਬੰਦੀ ਕਰਕੇ ਦੂਰ ਰੋਕ ਲਣ ਦੀ ਨੀਤੀ ਅੰਗਰੇਜਾਂ ਦੀ ਯਾਦ ਤਾਜਾ ਕਰਵਾਉਂਦੀ ਹੈ। ਪੁਲਿਸ ਦੇ ਇੱਕ ਅਧਿਕਾਰੀ ਨੇ ਮੰਨਿਆ ਕਿ ਹੁਕਮ 'ਚ ਬੱਧੇ ਹੋਣ ਕਰਕੇ ਉਹਨਾਂ ਦੀ ਮਜਬੂਰੀ ਹੈ ਜਦੋਂ ਕਿ ਆਪਣੇ ਹੱਕਾਂ ਲਈ ਲੜਨ ਵਾਲਿਆਂ ਦਾ ਕਹਿਣਾ ਸੀ ਕਿ ਅਜ਼ਾਦ ਦੇਸ਼ ਦੇ ਨਾਗਰਿਕਾਂ ਨਾਲ ਅਜਿਹਾ ਸਲੂਕ ਮਨੁੱਖੀ ਅਧਿਕਾਰਾਂ ਤੇ ਛਾਪਾ ਹੈ। ਆਂਗਣਵਾੜੀ ਮੁਲਾਜਮ ਯੂਨੀਅਨ ਪੰਜਾਬ (ਸੀਟੂ) ਦੀ ਪ੍ਰਧਾਨ ਊਸ਼ਾ ਰਾਣੀ ਦਾ ਕਹਿਣਾ ਸੀ ਕਿ ਆਪਣੀਆਂ ਮੰਗਾਂ ਨੂੰ ਲੈ ਕੇ ਅੰਦੋਲਨ ਕਰਨ ਵਾਲਿਆਂ ਪ੍ਰਤੀ ਅਪਣਾਇਆ ਜਾ ਰਿਹਾ ਵਤੀਰਾ ਪੂਰੀ ਤਰ•ਾਂ ਗੁਲਾਮੀ ਵਾਲੀ ਮਾਨਸਿਕਤਾ ਹੈ ਅੰਗਰੇਜਾਂ ਦੇ ਰਾਜ 'ਚ ਭਾਰਤੀਆਂ ਨੂੰ ਹਾਕਮਾਂ ਤੋਂ ਦੂਰ ਰੱਖਣ ਲਈ ਲਾਠੀ ਗੋਲੀ ਦੀ ਵਰਤੋਂ ਕੀਤੀ ਜਾਂਦੀ ਸੀ ਪਰ ਹੁਣ ਅਸੀਂ ਕਿਸੇ ਵਿਦੇਸ਼ੀ ਤਾਕਤ ਦੇ ਗੁਲਾਮ ਨਾ ਹੋ ਕੇ ਲੋਕਤੰਤਰੀ ਦੇਸ਼ ਦੇ ਵਸਨੀਕ ਹਾਂ ਫਿਰ ਵੀ ਲੋਕਾਂ ਨਾਲ ਗੁਲਾਮਾਂ ਵਰਗਾ ਵਿਹਾਰ ਕੀਤਾ ਜਾ ਰਿਹਾ ਹੈ। ਉੱਧਰ ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਦੇ ਜਨਰਲ ਸਕੱਤਰ ਲਛਮਣ ਸਿੰਘ ਸੇਵੇਵਾਲਾ ਦਾ ਕਹਿਣਾ ਸੀ ਕਿ ਸਰਕਾਰਾਂ ਨੂੰ ਵਾਅਦੇ ਮੁਤਾਬਿਕ ਬੇਰੁਜ਼ਗਾਰਾਂ ਨੂੰ ਰੁਜ਼ਗਾਰ ਦੇਣਾ ਚਾਹੀਦਾ ਹੈ ਤਾਂ ਜੋ ਉਹਨਾਂ 'ਚ ਅਸ਼ਾਂਤੀ ਪੈਦਾ ਹੀ ਨਾ ਹੋਵੇ ਜਦੋਂ ਕਿ ਹਕੀਕਤ ਇਹ ਹੈ ਕਿ ਕੁੱਟਣ ਨਾਲ ਕਿਸੇ ਨੂੰ ਸ਼ਾਂਤ ਨਹੀਂ ਕੀਤਾ ਜਾ ਸਕਦਾ ਬਲਕਿ ਗੁੱਸਾ ਵਧਦਾ ਹੈ। ਉਹਨਾਂ ਆਖਿਆ ਕਿ ਸਰਕਾਰਾਂ ਲੋਕਾਂ ਦੇ ਮਸਲੇ ਹੱਲ ਕਰਨ ਦੀ ਬਜਾਏ ਕਾਲੇ ਕਾਨੂੰਨਾਂ ਤੇ ਡੰਡੇ ਦਾ ਸਹਾਰਾ ਲੈ ਕੇ ਜਨਤਾ ਨੂੰ ਦਬਾਉਣਾ ਚਾਹੁੰਦੀਆਂ ਹਨ ਪਰ ਇਤਿਹਾਸ ਗਵਾਹ ਹੈ ਕਿ ਜਾਬਰ ਤੋਂ ਜਾਬਰ ਰਾਜ ਪ੍ਰਬੰਧ ਵੀ ਲੋਕ ਰੋਹ ਅੱਗੇ ਜਿਆਦਾ ਦੇਰ ਟਿਕ ਨਹੀਂ ਸਕੇ। ਮਜ਼ਦੂਰ ਆਗੂ ਨੇ ਦੁੱਖ ਪ੍ਰਗਟ ਕਰਦਿਆਂ ਕਿਹਾ ਕਿ ਜੋ ਕੁੱਝ ਪੰਜਾਬ 'ਚ ਪਿਛਲੇ ਸਮੇਂ ਤੋਂ ਚੱਲ ਰਿਹਾ ਹੈ ਉਸ ਨਾਲ ਅਖੌਤੀ ਜਮਹੂਰੀਅਤ ਦਾ ਲੀਰੋ-ਲੀਰ ਹੋਇਆ ਬੁਰਕਾ ਲੋਕਾਂ ਦੇ ਸਾਹਮਣੇ ਆ ਗਿਆ ਹੈ ਜਦੋਂ ਕਿ ਗੱਲਾਂ ਮਹਾਰਾਜਾ ਰਣਜੀਤ ਸਿੰਘ ਵਰਗੇ ਰਾਜ ਪ੍ਰਬੰਧ ਦੀਆਂ ਕੀਤੀਆਂ ਜਾ ਰਹੀਆਂ ਹਨ। ਇਸ ਮੁੱਦੇ ਤੇ ਆਪਣੇ ਵਿਚਾਰ ਦੱਸਦਿਆਂ ਈ. ਟੀ. ਟੀ. ਟੀਚਰਜ਼ ਯੂਨੀਅਨ ਪੰਜਾਬ ਦੀ ਕੋਰ ਕਮੇਟੀ ਦੇ ਮੈਂਬਰ ਜਗਸੀਰ ਸਿੰਘ ਸਹੋਤਾ ਨੇ ਕਿਹਾ ਕਿ ਪਿਛਲੇ ਦਿਨੀਂ ਜਿਸ ਢੰਗ ਨਾਲ ਈ. ਟੀ. ਟੀ. ਅਧਿਆਪਕਾਂ ਤੇ ਦੋ ਸੀਨੀਅਰ ਅਫਸਰਾਂ ਦੀ ਹਾਜ਼ਰੀ 'ਚ ਤਸ਼ੱਦਦ ਕੀਤਾ ਗਿਆ ਉਸ ਨੂੰ ਲੈ ਕੇ ਬੁੱਧੀਜੀਵੀਆਂ ਤੇ ਅਧਿਆਪਕਾਂ 'ਚ ਰੋਸ ਪੈਦਾ ਹੋ ਗਿਆ ਹੈ। ਉਹਨਾਂ ਆਖਿਆ ਕਿ ਆਪਣੇ ਨਾਲ ਕੀਤੇ ਵਾਅਦਿਆਂ ਦੀ ਪੂਰਤੀ ਖਾਤਰ ਆਪਣੀ ਅਵਾਜ਼ ਬੁਲੰਦ ਕਰਨ ਲਈ ਲੋਕਾਂ ਨੇ ਮੰਤਰੀਆਂ ਜਾਂ ਜਿੰਮੇਵਾਰ ਅਧਿਕਾਰੀਆਂ ਕੋਲ ਪੁੱਜਣਾ ਹੁੰਦਾ ਹੈ ਇਸ ਲਈ ਅਜਿਹੇ ਪ੍ਰਬੰਧ ਕਰਨੇ ਜਰੂਰੀ ਹਨ ਤਾਂ ਕਿ ਉਹ ਆਪਣੇ ਦੁੱਖ ਰੋ ਸਕਣ ਪਰ ਇੱਥੇ ਤਾਂ ਸਿਆਸਤਦਾਨ ਕੁਫਰਾਂ ਦੀ ਪੰਡ ਤੋਲ ਕੇ ਸੱਤਾ ਤੇ ਕੀ ਬੈਠੇ ਲੋਕਾਂ ਵੱਲੋਂ ਪਿੱਠ ਹੀ ਕਰ ਲਈ ਹੈ। ਪੁਲਿਸ ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਆਪਣੀ ਪਛਾਣ ਗੁਪਤ ਰੱਖਦਿਆਂ ਇਹ ਮੰਨਿਆ ਕਿ ਪਿਛਲੇ 4 ਸਾਲਾਂ ਦੌਰਾਨ ਪੁਲਿਸ ਦੀ ਦਿੱਖ ਪ੍ਰਭਾਵਿਤ ਹੋਈ ਹੈ। ਉਹਨਾਂ ਕਿਹਾ ਕਿ ਜਦੋਂ ਤੱਕ ਸੱਤਾ ਪੱਖ ਦੇ ਰਾਜਨੀਤੀਵਾਨ ਅਤੇ ਪ੍ਰਸ਼ਾਸ਼ਨ ਚਲਾਉਣ ਵਾਲੇ ਅਫਸਰ ਨਾਗਰਿਕਾਂ ਦੀਆਂ ਦੁੱਖ ਤਕਲੀਫਾਂ ਸੁਣਕੇ ਉਹਨਾਂ ਦਾ ਹੱਲ ਨਹੀਂ ਕੱਢਦੇ ਤਾਂ ਰੋਸ ਵਧਣਾ ਸੁਭਾਵਿਕ ਹੀ ਹੈ।