ਗੋਬਿੰਦਪੁਰਾ ਦੀਆਂ ਨੰਨੀਆਂ ਛਾਵਾਂ ਵੱਲੋਂ ਜਮੀਨ ਬਚਾਉਣ ਦਾ ਅਹਿਦ

ਬਠਿੰਡਾ, ਅਸ਼ੋਕ ਵਰਮਾ


ਗੋਬਿੰਦਪੁਰਾ ਦੀਆਂ ਅੱਧੀ ਦਰਜ਼ਨ ਮੁਟਿਆਰਾਂ ਧੀਆਂ ਨੇ ਆਪਣੀ ਜਮੀਨ ਬਚਾਉਣ ਦੇ ਅਹਿਦ ਦਾ ਪ੍ਰਗਟਾਵਾ ਕਰਦਿਆਂ ਪੰਜਾਬ ਦੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਮਿਹਣੇ ਮਾਰੇ ਕਿ ਸਾਡਾ ਕਸੂਰ ਤਾਂ ਦੱਸ ਦੇਣ ਕਿ ਕਿਉਂ ਸਾਡੇ ਤੇ ਇਰਾਦਾ ਕਤਲ ਵਰਗੀਆਂ ਸੰਗੀਨ ਧਾਰਾਵਾਂ ਤਹਿਤ ਪਰਚੇ ਦਰਜ਼ ਕਰਕੇ ਨਾ ਕੇਵਲ ਜੇਲ•ੀ ਡੱਕਿਆ ਜਾ ਰਿਹਾ ਹੈ ਬਲਕਿ ਬੇਲਗਾਮ ਹੋਈ ਪੁਲਿਸ ਸਾਡੀ ਸਕੂਲੋਂ ਆਉਂਦੀਆਂ-ਜਾਂਦੀਆਂ ਦੀ ਬੇਪਤੀ ਕਰਨ ਤੇ ਉੱਤਰ ਆਈ ਹੈ। ਇਹ ਲੜਕੀਆਂ ਅਪ੍ਰੇਸ਼ਨ ਗ੍ਰੀਨ ਹੰਟ ਵਿਰੋਧੀ ਫਰੰਟ ਦੇ ਪ੍ਰੋਗਰਾਮ 'ਚ ਸ਼ਾਮਲ ਹੋਣ ਪੁੱਜੀਆਂ ਸਨ। +2 ਦੀ ਵਿਦਿਆਰਥਣ ਸੁਖਦੀਪ ਕੌਰ ਦੱਸਦੀ ਹੈ ਕਿ ਉਸਦੇ ਪ੍ਰੀਵਾਰ 'ਚੋਂ ਕਦੇ ਕਿਸੇ ਜੀਅ ਨੇ ਥਾਣੇ ਦਾ ਮੂੰਹ ਨਹੀਂ ਵੇਖਿਆ ਸੀ, ਜਿਹੜਾ ਇਸ ਧਰਮੀ ਰਾਜੇ ਦੇ ਰਾਜ ਨੇ ਦਿਖਾ ਦਿੱਤਾ। ਉੁਸਦਾ ਪਿਤਾ ਪੰਜ ਲੱਖ ਦਾ ਕਰਜਈ ਹੈ। ਕਰਜ਼ਾ ਦਿਨੋਂ-ਦਿਨ ਵਧੀ ਜਾ ਰਿਹਾ ਹੈ। ਪੁਲਿਸ ਦੇ ਦੁਰਵਿਵਹਾਰ ਦੀ ਸ਼ਿਕਾਰ ਸੁਖਦੀਪ ਨੇ ਕਿਹਾ ਕਿ ਮੇਰੇ ਬਾਪ ਦੀ ਉਮਰ ਦੇ ਸਿਪਾਹੀਆਂ ਨੇ ਸਾਨੂੰ ਧੱਕੇ ਮਾਰੇ, ਗਾਲਾਂ ਕੱਢੀਆਂ ਅਤੇ ਗੁੱਤਾਂ ਪੁੱਟਣ ਦੀਆਂ ਧਮਕੀਆਂ ਦਿੱਤੀਆਂ ਜੋ ਕਿ ਲੋਕ ਰਾਜ ਦੇ ਮੱਥੇ ਤੇ ਕਲੰਕ ਹੈ। ਉਸ ਨੇ ਦੱਸਿਆ ਕਿ ਇਸ ਦੌਰਾਨ ਪੇਪਰ ਚੱਲ ਰਹੇ ਸਨ ਤਾਂ ਇਹ ਹੌਲਦਾਰ ਨੇ ਜਬਰੀ ਨਾਕੇ ਤੇ ਰੋਕ ਕੇ ਰੱਖਿਆ ਜਿਸ ਦੇ ਸਿੱਟੇ ਵਜੋਂ ਉਹ 1 ਘੰਟਾ ਲੇਟ ਹੋ ਗਈ। ਉਸ ਨੇ ਆਖਿਆ ਕਿ ਬਾਹਰ ਆਉਣ ਜਾਣ ਵੇਲੇ ਤੰਗ ਕਰਦਿਆਂ ਪੁਲਿਸ ਆਖਦੀ ਹੈ ਕਿ ਚੈੱਕ ਲੈ ਲਓ ਨਹੀਂ ਤਾਂ ਏਦੂ ਵੀ ਮਾੜੀ ਕਰਾਂਗੇ।
ਗਗਨਪ੍ਰੀਤ ਕੌਰ ਦੀ ਯੋਗਤਾ ਐਨ. ਟੀ. ਟੀ. ਤੇ ਈ. ਟੀ. ਟੀ. ਹੈ। ਅਧਿਆਪਕ ਬਨਣ ਦੇ ਕਾਬਲ ਇਸ ਲੜਕੀ ਤੇ ਤਾਂ ਇਰਾਦਾ ਕਤਲ ਦਾ ਪਰਚਾ ਦਰਜ਼ ਹੈ ਹੀ ਬਲਕਿ ਪਿਤਾ ਗੁਰਲਾਲ ਸਿੰਘ 'ਤੇ 3, ਮਾਂ ਤੇ 1 ਅਤੇ ਭੈਣ 'ਤੇ ਵੀ ਧਾਰਾ 307 ਦਾ 1 ਕੇਸ ਦਰਜ਼ ਹੈ। ਗਗਨਪ੍ਰੀਤ ਦੀ ਭੈਣ ਅਮਨਪ੍ਰੀਤ ਕੌਰ ਦਾ ਵੀ ਦੁੱਖ ਕਿਸੇ ਗੱਲੋਂ ਘੱਟ ਨਹੀਂ। ਇਰਾਦਾ ਕਤਲ ਦੇ ਦੋਸ਼ਾਂ 'ਚ 1 ਵਾਰ ਬਠਿੰਡਾ ਜੇਲ• ਅਤੇ 5 ਵਾਰ ਥਾਣੇ ਜਾ ਚੁੱਕੀ ਹੈ। ਪਿਤਾ ਗੁਰਲਾਲ ਸਿੰਘ ਜਮੀਨ ਬਚਾਓ ਸੰਘਰਸ਼ ਕਮੇਟੀ ਦਾ ਪ੍ਰਧਾਨ ਹੈ। ਸਾਰਾ ਪ੍ਰੀਵਾਰ ਜਮੀਨ ਬਚਾਉਣ ਲਈ ਚੱਲ ਰਹੇ ਸੰਘਰਸ਼ 'ਚ ਕੁੱਦਿਆ ਹੋਇਆ ਹੈ। ਪੁਲਿਸ ਪ੍ਰਤੀ ਦਿਲ 'ਚ ਨਫਰਤ ਦੀ ਅੱਗ ਬਾਲੀ ਬੈਠੀਆਂ ਇਹ ਭੈਣਾਂ ਆਖਦੀਆਂ ਹਨ ਕਿ ਅਸੀਂ ਸੁਣਿਆ ਸੀ ਬਈ ਪੁਲਿਸ ਧੱਕੇਸ਼ਾਹੀਆਂ ਕਰਦੀ ਹੈ ਪਰ ਹੁਣ ਸਾਨੂੰ ਅੱਖੀ ਦਿਖਾ ਦਿੱਤਾ ਹੈ। +2 ਦੀ ਵਿਦਿਆਰਥਣ ਹਰਪ੍ਰੀਤ, ਉਸਦੇ ਮਾਤਾ-ਪਿਤਾ ਅਤੇ 1 ਭਰਾ ਨੂੰ ਵੀ ਜਰਕਾਉਣ ਲਈ ਪੁਲਿਸ ਨੇ ਧਾਰਾ 307 ਹੇਠ ਲਪੇਟ ਲਿਆ ਹੈ। ਇਸ ਪ੍ਰੀਵਾਰ ਦੇ 2 ਕਿੱਲੇ ਹਰੇ ਭਰੇ ਝੋਨੇ ਨੂੰ ਨਸ਼ਟ ਕਰਨ ਲਈ ਦਵਾਈ ਛਿੜਕਾ ਦਿੱਤੀ ਪਰ ਇਹ ਲੋਕ ਆਪਣੀ ਜੱਦੀ ਪੁਸ਼ਤੀ ਜ਼ਮੀਨ ਬਚਾਉਣ ਲਈ ਲੜ ਰਹੇ ਹਨ। ਕਿਸਾਨ ਆਗੂ ਗੁਰਲਾਲ ਸਿੰਘ ਦੀ ਭਤੀਜੀ ਹਰਮਨਦੀਪ ਕੌਰ ਦੇ ਪ੍ਰੀਵਾਰ ਦੀ 15 ਏਕੜ ਜਮੀਨ ਥਰਮਲ ਦੀ ਮਾਰ 'ਚ ਆਈ ਹੋਈ ਹੈ। ਹਰਮਨਦੀਪ ਮਰਨ ਨੂੰ ਤਿਆਰ ਹੈ ਪਰ ਜਮੀਨ ਛੱਡਣਾ ਨਹੀਂ ਚਾਹੁੰਦੀ। ਮਾਪਿਆਂ ਤੇ ਸਖਤ ਧਾਰਾਵਾਂ ਤਹਿਤ ਪਰਚੇ ਦਰਜ਼ ਹੋਣ ਦੇ ਬਾਵਜੂਦ ਇਹ ਕੁੜੀ ਜਮੀਨ ਨੂੰ ਆਪਣੀ ਮਾਂ ਦੱਸਦੀ ਮਰਨਾ ਤਾਂ ਮਨਜੂਰ ਕਰਦੀ ਹੈ ਪਰ ਹੱਕ ਛੱਡਣ ਨੂੰ ਤਿਆਰ ਨਹੀਂ। 
ਜਮੀਨ ਬਚਾਉਣ ਲਈ ਸਭ ਕੁੱਝ ਨਿਛਾਵਰ ਕਰਨ ਦੀ ਗੱਲ ਕਰਨ ਵਾਲੀ ਬਿਰਧ ਸੁਰਜੀਤ ਕੌਰ ਨੇ ਆਖਿਆ ਕਿ ਉਹਨਾਂ ਮੁਆਵਜੇ ਦੇ ਚੈੱਕ ਨਹੀਂ ਚੁੱਕੇ ਤਾਂ ਉਹ ਕਿਹੜਾ ਥਾਣਾ ਹੈ ਜਿੱਥੇ ਸਾਨੂੰ ਲਿਜਾਇਆ ਨਹੀਂ ਗਿਆ। ਉਸ ਨੇ ਆਖਿਆ ਕਿ ਉਹ 50 ਵਰ•ੇ ਪਹਿਲਾਂ ਡੋਲੀ 'ਚ ਬੈਠ ਕੇ ਆਈ ਸੀ ਤੇ ਹੁਣ ਅਰਥੀ ਵੀ ਗੋਬਿੰਦਪੁਰੇ 'ਚੋਂ ਉੱਠੇਗੀ ਪਰ ਜਮੀਨ ਨਹੀਂ ਛੱਡੇਗੀ। ਇਹਨਾਂ ਸਭਨਾਂ ਨੇ ਆਖਿਆ ਕਿ ਜਮੀਨ ਸਾਡੀ ਮਾਂ ਹੈ ਅਸੀਂ ਕਿਸੇ ਕੰਪਨੀ ਨੂੰ ਨਹੀਂ ਦਿਆਂਗੀਆਂ। ਉਹਨਾਂ ਆਖਿਆ ਕਿ ਸਰਕਾਰ ਸਾਡੀਆਂ ਲਾਸ਼ਾਂ ਤੋਂ ਬਾਅਦ ਹੀ ਇਸ ਤੇ ਕਬਜਾ ਕਰ ਸਕਦੀ ਹੈ। ਉਹਨਾਂ ਦੁੱਖ ਪ੍ਰਗਟ ਕੀਤਾ ਕਿ ਹਾਕਮਾਂ ਦੀ ਨੂੰਹ ਜਿਸ ਨੇ ਵੋਟਾਂ ਦੀ ਖਾਤਰ ਸਾਡਾ ਵਿਹੜਾ ਨੀਵਾਂ ਕਰ ਛੱਡਿਆ ਸੀ ਪਰ ਦੁੱਖ ਵੇਲੇ ਸਾਡੀ ਬਾਤ ਨਹੀਂ ਪੁੱਛੀ। ਉਹਨਾਂ ਆਖਿਆ ਕਿ ਸਾਨੂੰ ਉਹ ਦਿਨ ਯਾਦ ਹੈ ਜਦੋਂ ਗੋਬਿੰਦਪੁਰੇ 'ਚ ਚੁੰਨੀਆਂ ਵਟਾਈਆਂ ਸਨ ਪਰ ਉਸੇ ਹੀ ਟੱਬਰ ਦੇ ਰਾਜ 'ਚ ਪੁਲਿਸ ਨੇ ਧੀਆਂ ਭੈਣਾਂ ਦੀਆਂ ਚੁੰਨੀਆਂ ਰੋਲੀਆਂ ਅਤੇ ਇਹੋ ਜਿਹੇ ਮੰਦੇ ਬੋਲ ਬੋਲੇ ਜਿੰਨਾਂ ਦੀ ਗੱਲ ਕਰਦਿਆਂ ਸ਼ਰਮ ਆਉਂਦੀ ਹੈ।
ਲੋਕ ਮੋਰਚਾ ਪੰਜਾਬ ਦੀ ਜ਼ਿਲ•ਾ ਪ੍ਰਧਾਨ ਪੁਸ਼ਪ ਲਤਾ ਦਾ ਕਹਿਣਾ ਸੀ ਕਿ ਦੁੱਖ ਦੀ ਗੱਲ ਇਹ ਹੈ ਕਿ ਮਹਿਲਾ ਮੈਂਬਰ ਪਾਰਲੀਮੈਂਟ ਤੇ ਬਾਦਲ ਪ੍ਰੀਵਾਰ ਦੀ ਨੂੰਹ ਹਰਸਿਮਰਤ ਕੌਰ ਬਾਦਲ ਦੇ ਹਲਕੇ 'ਚ ਪੁਲਿਸ ਪੰਜਾਬ ਦੀਆਂ ਧੀਆਂ ਨੂੰ ਕੁਟਾਪੇ ਚਾੜ੍ਰਕੇ ਜੇਲਾਂ ਦਾ ਰਸਤਾ ਦਿਖਾ ਰਹੀ ਹੈ ਪਰ ਉਸ ਨੇ ਭੇਦਭਰੇ ਢੰਗ ਨਾਲ ਚੁੱਪ ਧਾਰੀ ਹੋਈ ਹੈ ਜਦੋਂ ਕਿ ਬਾਹਰ ਕਿਤੇ ਵਾਪਰੀ ਮਾਮੂਲੀ ਘਟਨਾ ਬਾਰੇ ਉਹ ਅਸਮਾਨ ਸਿਰ ਤੇ ਚੁੱਕ ਲੈਂਦੀ ਹੈ। ਉਹਨਾਂ ਮੰਗ ਕੀਤੀ ਕਿ ਸਰਕਾਰ ਗੋਬਿੰਦਪੁਰਾ ਦੇ ਲੋਕਾਂ ਦੀ ਜਮੀਨ ਵਾਪਿਸ ਕਰੇ ਅਤੇ ਪੁਲਿਸ ਵੱਲੋਂ ਕੀਤੀਆਂ ਜਿਆਦਤੀਆਂ ਦੀ ਜਾਂਚ ਕਰਕੇ ਕਸੂਰਵਾਰਾਂ ਨੂੰ ਸਖਤ ਸਜਾ ਦਿੱਤੀ ਜਾਵੇ।

ਦੋ ਸਕੀਆਂ ਭੈਣਾਂ ਵੀ ਮੈਦਾਨ 'ਚ ਡਟੀਆਂ


ਆਪਣੀ ਜ਼ਮੀਨ ਬਚਾਉਣ ਲਈ 76 ਵਰਿਆਂ ਦੀ ਅਮਰਜੀਤ ਕੌਰ ਅਤੇ 56 ਸਾਲਾਂ ਦੀ ਸੁਖਦੇਵ ਕੌਰ ਵੀ ਮੈਦਾਨ 'ਚ ਡਟੀਆਂ ਹੋਈਆਂ ਹਨ। ਦੋਵਾਂ ਭੈਣਾਂ ਦੀ ਕਹਾਣੀ ਦੁੱਖ ਭਰੀ ਹੈ। ਅਮਰਜੀਤ ਕੌਰ ਗੋਬਿੰਦਪੁਰਾ ਦੇ ਜੱਗਾ ਸਿੰਘ ਨੂੰ ਵਿਆਹੀ ਹੋਈ ਸੀ। ਕੋਈ ਔਲਾਦ ਨਾ ਹੋਣ ਕਰਕੇ ਛੋਟੀ ਭੈਣ ਸੁਖਦੇਵ ਕੌਰ ਨੂੰ ਵੀ ਪਤੀ ਦੇ ਲੜ ਲਾ ਦਿੱਤਾ ਪਰ ਉਸਦੀ ਕੁੱਖੋ ਵੀ ਬੱਚੇ ਨੇ ਜਨਮ ਨਾ ਲਿਆ। ਇਹਨਾਂ ਦੋਵਾਂ ਤੇ ਦੁੱਖਾਂ ਦਾ ਪਹਾੜ ਉਦੋਂ ਟੁੱਟਾ ਜਦੋਂ ਜੱਗਾ ਸਿੰਘ ਚੜਾਈ ਕਰ ਗਿਆ। ਅੱਜ ਬਠਿੰਡਾ ਪੁੱਜੀ ਸੁਖਦੇਵ ਕੌਰ ਨੇ ਆਖਿਆ ਕਿ ਭਾਵੇਂ ਜਾਨ ਕੁਰਬਾਨ ਹੋ ਜਾਵੇ ਦੋਵੇਂ ਭੈਣਾਂ ਪਤੀ ਦੀ ਨਿਸ਼ਾਨੀ ਬਚਾਉਣ ਲਈ ਸਿਰਤੋੜ ਯਤਨ ਕਰਨਗੀਆਂ। ਸੁਖਦੇਵ ਕੌਰ ਨੇ ਆਖਿਆ ਕਿ 'ਰਾਜ ਨਹੀਂ ਸੇਵਾ' ਵਾਲਿਆਂ ਦਾ ਇਹ ਕੇਹਾ ਰਾਜ ਹੈ ਜਿਸ 'ਚ ਔਰਤਾਂ ਦੇ ਪੱਟਾਂ ਅਤੇ ਢਿੱਡਾਂ ਤੇ ਘੋੜੇ ਚੜਾਏ ਗਏ ਅਤੇ ਧੌਲਾ ਝਾਟਾ ਪੱਟਿਆ ਗਿਆ